आंशिक बजेट हयेत लँपु चायेकाबीगु : महत
नेपाली कांग्रेस नेता डा. रामशरण महतं आंशिक बजेट हयेगु लागि लँपु चायेका बीगु धयादीगु दु ।
आइतवाः रिपोर्टस क्लब नेपालय् जूगु साक्षात्कार ज्याझ्वलये न्ववानादिसें वय्कलं उगु खँ धयादीगु खः । नेता महतं थुगु सरकारं पूवंक बजेट हयेमफइगु व आंशिक बजेट हयेगु खःसा लँ त्वःताबीगु धयादिल ।
वय्कलं थः अर्थमन्त्री व गिरीजा प्रसाद कोइराला प्रधानमन्त्री जुयागु इलय् काम चलाउ सरकारं आंशिक बजेट जक हयागु खँ न्ह्यथनादिसें वर्तमान सरकारया मन्त्री व प्रधानमन्त्री पूवंक बजेट हयेगु खँल्हानाच्वनेगु धइगु मल्वःगु नं जिकिर यानादिल ।
ज्याझ्वलय् शान्ति मन्त्री टोप बहादुर रायमाझीं धाःसा नेपाली कांग्रेस व नेकपा एमालें चाहे मजूसां पूवंक बजेट हयेगु व वनं श्रावण १ गते हयेगु नं दावी यानादिल । वय्कलं शान्ति व सघीयता, सरकारया नेतृत्व व चुनावया सुनिश्चितता मजूतले दलत सतकय् वनाः यक्वः हाःसां नं राजीनामा मबीगु धयादिल ।
थ्वहे झ्वलय् नेकपा एमालेया न्वकू विद्या भण्डारीं राष्ट्रपितं प्रधानमन्त्रीयात वर्खास्त यानाः जूसां न्हूगु सरकार दयेकेत पहल यायेमाःगु धयादिल ।
