फोरम तज्यायेगु ज्याया निरन्तरता
सत्तारुढ मधेसी जनअधिकार फोरम गणतान्त्रिकं कार्यवाहक नायःया जिम्मेवारी कयाच्वंम्ह राजकिशोर यादवयात पदमुक्त याःगु दु ।
पार्टीया नीति अःखः वंगु व कार्यवाहक नायःया जिम्मा बीधुंकाः छक्वः नं केन्द्रीय समितिया मुँज्या मसःतूगु धाःसें बहुमत दुजःतय्गु सहमतिइ कार्यवाहक नायः यादवयात पदपाखें चीकूगु नेता राजलाल यादवं न्ह्यथंगु दु ।
नेता राजलाल यादवया कथं पदया जिम्मेवारी सह अध्यक्ष नन्दन कुमार दत्तयात बिउगु दु । थुगु कारवाहीस लाःम्ह यादव पार्टीपाखें वर्तमान सरकारय् संचारमन्त्री जुयाच्वनादीगु दु ।
सह अध्यक्ष नन्दनकुमार दत्त लिसेंया १२ म्ह बहुमत केन्द्रीय दुजःतय्सं कार्यवाहक नायःयात चीकूगु जानकारी निर्वाचन आयोगयात याकूगु दु । दत्तं नीनिम्ह दुजःत दुगु केन्द्रीय समितिइ थःपिनिगु पक्षय् िझंनिम्ह केन्द्रीय दुजःत दुगु दावी याःगु दु ।
थुगु कारवाही लिपा संविधानसभा चुनावया इलय् छगू जक दुगु मधेसी जनअधिकार फोरम थौंया ईतक वःगुइलय् प्यंगू कुचा जुइधुंकूगु दुसा थुकियात निरन्तरता बीगु ज्या नं जुयाच्वंगु दु ।
थ्वहे झ्वलय् केन्द्रीय दुजःतय्सं पार्टीया कार्यवाहक नायः यादवयात पदमुक्त याःगु दावी यानाच्वंगु इलय् संचारमन्त्री तकं जुयादीम्ह कार्यवाहक नायः यादवं धाःसा कारवाहीया छुं नं औचित्य मदुगु धयादीगु दु ।
वय्कलं सुं सुं केन्द्रीय दुजःतय्सं याःगु थजाःगु क्वःछिना अवैधानिक जूगु दावी यानादिसें धयादिल, "जितः गुकथं कारवाही यात ? केन्द्रीय समितिया मुँज्या सुया अध्यक्षताय् च्वन ?" सुं सुं पासािपं प्रलोभनय् लानाः थःत चीकूगु हल्ला जक याःगु कार्यवाहक नायः यादवया धापू दु ।
