"धर्मादित्य धर्माचार्य सिरपाः" मन्त्री डा. शाक्ययात
विज्ञान नापं वातावरण मन्त्री डा. केशवमान शाक्ययात आइतवाः छगू ज्याझ्वःया दथुइ" झिंछक्वःगु धर्मादित्य धर्माचार्य सिरपाः" लःल्हात ।
मांभाय् पुचः यलया ग्वसालय् जूगु उगु ज्याझ्वलय् ज्याझ्वःया मूपाहां नापं नेपाल प्रज्ञा प्रतिष्ठानया कूलपति बैरागी काईंलां नेपाः राष्ट्रिय पार्टीया नायः नापं मन्त्री डा. शाक्ययात सिजःपौ नापं नगद सिरपाः न्याद्वः तका लःल्हानादीगु खः । उगु ज्याझ्वलय् प्रा. प्रेमशान्ति तुलाधरयात नं मूपाहां काईंलापाखें हनादीगु खः ।
पुचःया नायः विजय शाक्यया सभाध्यक्षताय् जूगु उगु ज्याझ्वलय् मूपाहां नापं कुलपति वैरागी काईंला, सिरपाः त्याकादीम्ह मन्त्री डा. केशवमान शाक्य, सिरपाः निर्णायक समितिया संयोजक डा. पुष्पराज राजकर्णिकार, प्रा. प्रेमशान्ति तुलाधर, पुचःया सल्लाहकार शाक्य सुरेन नापं नेवाः देय् दबूया नायः नरेश ताम्रकारं धर्मादित्य धर्माचार्यया बारे नापं थःथःगु नुगः खँ व भिन्तुना बियादीगु खः ।
ज्याझ्वलय् सिरपाः कयादीम्ह मन्त्री डा. शाक्यं सिरपाः कथं बिउगु न्याद्वः तकाय् तँसा झिद्वः तका तनाः मुक्कं झिंन्याद्वः तका सिरपाः कोषया लागि पुचःया नायः विजय शाक्ययात लःल्हानादीगु खः । थ्वहे झ्वलय् थगुने झिक्वःगु "धर्मादित्य धर्माचार्य सिरपाः" त्याकादीम्ह भाजु नानीभाइ मिखाद्वंमियात नं सिरपाः कोषया लागि झिंन्हय्द्वः तका बियाः ग्वाहालि यानादीगुलिं ज्याझ्वलय् हनापौ देछायेगु ज्या जूगु खः ।
डा. केशवमान शाक्यं नेपालभाषा व खस भाषं पिदनीगु "लाय्कू" बाछि पतिइ "शाक्य जाति : उत्थान व पतन" च्वसु च्वयादीगुलिं थुगुसिया "धर्मादित्य धर्माचार्य सिरपाः" लःल्हाःगु खः ।
नेपालभाषाया न्हापांम्ह पत्रकार धर्मादित्य धर्माचार्यया १११ क्वःगु बुन्हिया लसताय् थुगु सिरपाः लःल्हाःगु खः । मांभाय् पुचःपाखें दँय्दसं थुगु सिरपाः बिया वयाच्वंगु दु ।
