महर्जन थपू गुथिया न्हूम्ह नायः
नेपाःया मौलिक लिपि प्रचलित नेपाल लिपि, रंजना लिपि नापं थी थी लिपिया प्रचार प्रसार व थपू यायेगु तातुनां नीस्वनातःगु लिपि थपू गुथिया शनिवाः छगू ज्याझ्वःया दथुइ खुक्वःगु तःमुँज्या जुल । यलया कुतिसौगलय् जूगु उगु तःमुँज्यापाखें मंगल महर्जनया अध्यक्षताय् ज्यासना पुचः न्हूधाः नं जूगु दु । उगु ज्यासना पुचलय् राजीत बहादुर श्रेष्ठ न्वकू, कबीर महर्जन छ्यान्जे व सनी अवाले दांभरि जुयादीगु दु । अथेहे दुजलय् मोबिन्सन शाक्य, विक्रम शाक्य व मुकेश महर्जन च्वनादीगु दु ।
न्हूधाः जुइ न्ह्यः गुथिया नायः धर्मकृष्ण सिकःमिया सभाध्यक्षताय् जूगु खुक्वःगु तःमुँज्याय् छ्यान्जे राजीत बहादुर श्रेष्ठं प्रगति प्रतिवेदन व दांभरि सरोज ताम्रकारं आर्थिक प्रतिवेदन न्ह्यब्वयादीगु खः ।
थ्वहे झ्वलय् गुथियात सुथांलाक्क न्ह्याकेगु लागि कोष नीस्वनेत सुनिल गोपाल ताम्रकारं झिद्वः तकाः लःल्हानादीगु खःसा गुथिया सल्लाहकार नापं संस्थापक लोकरत्न शाक्यया संयोजकत्वय् छगू अक्षय कोष नं नीस्वंगु दु ।
लिपिया प्रचार प्रसार यायेगु लागि थुगु गुथिपाखें स्वनिगःया थी थी लागाय् वनाः प्रशिक्षण बीगु, लिपि थपू लय् पौ, दँ पौ नापं लिपिया सफू पिथनेगु ज्या याना वयाच्वंगु दु ।
