प्रतिवेदनय् 'सशस्त्र युद्ध' च्वइगु
संविधानसभाय् न्ह्वइगु संविधानसभा सांस्कृतिक व सामाजिक ऐक्यवद्धता आधार निर्माण समितिया अवधारणा पौलय् 'जनयुद्ध'या पलेसा: 'सशस्त्र युद्ध' खँग्व: छ्यलीगु जूगु दु ।
जनयुद्ध खँग्व:लय् विवाद अप्वयेवं समितिया सोमवा:या बैठकय् जूगु मतदानय् जनयुद्ध खँग्व: च्वयेगु पक्षय् झिंनिगू व सशस्त्र युद्ध च्वयेगु पक्षय् झिंगुंगू मत ला:गु ख: । समितिइ पीनिम्ह सभासदत दुगु खसां थौंया बैठकय् स्वीनिम्ह सभासद्तय् जक उपस्थिति दुगु ख: । छगू मत धासा: तटस्थ ला:गु ख: ।
बैठकय् अवधारणा पौलय् माओवादी जनयुद्ध तयेगु वा मतयेगु विषयस विवाद उत्पन्न जुइवं अन्तिम निर्णय यायेत मतदान या:गु ख: ।
मतदान स्वयां न्ह्य: बैठकय् अवधारणा पौलय् 'माओवादी जनयुद्ध' धाःगु खँग्व: तय्गु व मतेगु धकाः विवाद जूगु दु ।
बैठकय् कांग्रेस व एमालें सशस्त्र द्वन्द्व धायेमाःगु अडान काःगु दुसाः माओवादीं धासाः जनयुद्ध हे धायेमाःगु अडान कयाच्वंगु दु । बैठकय् कांग्रेस सभासद रणबहादुर लिम्बूं माओवादीया झिदँया युद्धय् ज्यादती अप्व जूगुलिं थुकीयात जनयुद्ध धका धयेमफइगु धायेवं बैठक स्थल तनावग्रस्त जूगु खः । माओवादीया सभासद कालिबहादुर मल्लं कांग्रेस व एमालें न्हापा युद्धकालय् हत्या, बलात्कार व बेपत्ता याःगु द्वपं बियादिल ।
विवाद अप्वःगुलिं समितिया सभापति नवोसदित्ता चौधरीं बैठक नियन्त्रण यायेत तःक्वः हे कुतः यासां खँ मिलेमजुइवं विवादयात मतदान यायेगु निर्णय या:गु ख: ।
