एमाले उपत्यका कमिटीइ खस–ब्रम्हुतय् वर्चश्व
थौं कन्हय् पहिचान सहितया संघीयताया माग याइपिं व विरोध याइपिं दथुइ सीदयेक राजनीतिक धुव्रीकरण जुयावनाच्वंगु दु । उकीया हे लिच्वः नेपाली कांग्रेस व नेकपा (एमाले) दुने खने दयाच्वंगु दु ।
थ्वहे झ्वलय् छुं ई न्ह्यः जक पार्टी नेतृत्वं ज्वंगु पहिचान मदुगु संघीयता खँय् असहमति प्वंकाच्वम्ह नेवाः न्ह्यलुवा नापं एमाले नेता राजेन्द्र श्रेष्ठयात एमालेया उपत्यका समन्वय कमिटीया संयोजकपाखें चीकाः कृष्णगोपल श्रेष्ठयात उगु जिम्मेवारी बिउगु खः ।
पहिचान सहितया राज्य पुनर्संरचना जुइमाःगु एमालेया माग कायम हे जुइमाः धासें राजेन्द्र श्रेष्ठ सहित मेपिं आदिवासी जनजाति नेतातय्सं पार्टी नेतृत्व प्रति असन्तुष्टि प्वंकूसें पार्टीया ज्याझ्वः बहिष्कार यानाच्वंगु खः । एमालें राजेन्द्र श्रेष्ठ ज्याय् लिहांमवतले उगु जिम्मेवारी मेम्ह नेता कृष्णगोपालयात बिउगु धाःसां राजेन्द्र श्रेष्ठं पहिचानया मुद्दायात तच्वयेकः ल्ह्वनाच्वंगुलिं कारवाही स्वरुप जिम्मेवारीं चिइकूगु खँ एमाले स्रोतं धाःगु दु ।
स्रोतया कथं एमालें राजेन्द्र श्रेष्ठयात चिइकाः पहिचान सहितयात मुद्दायात कमजोर यायेगु जक मखु एमालेयात पूर्णरुपं ब्राम्हणवादी पार्टीया कथं विकास यायेगु योजन कथं न्ह्याः वनाच्वंगु दावी याःगु दु । उगु हे योजना कथं राजेन्द्र श्रेष्ठयात चीकेधुंकाः उपत्यका समन्वय कमिटीइ नेवाःतय्त अल्पमतय् लाकीगु कथं झिंच्याम्ह न्हूपिं दुजःत मनोनित याःगु दु । मनोनित जूपिं फुक्क धाइथें खँय् ब्रम्हु व दलितत दु ।
न्हापा पीन्याम्ह दुजः दुगु कमिटीइ आः झिंच्याम्ह थप यानाः नेवाःतय् बाहुल्यता दुगु लागाया कमिटीइ नेवाःतय्त हे अल्पमतय् लाकीगु ज्या याःगु दावी स्रोतं याःगु दु । थुकीया अर्थ एमालें नेवाः राज्यया माग पूर्ण रूपं अस्वीकार याःगु व पार्टी दुने ब्राम्हणवादी प्रवृत्ति झन हावी जूगु दावी स्रोतं याःगु दु ।
एमालें टंक कार्की, प्रमेश हमाल, राजन भट्टराई, किशोर विक्रम मल्ल, कल्पना रिजाल, कमला पराजुली, प्रमेल खड्का, वेदनिधि निरौला, कमल गौतम, नवराज पौडेल, खग्रेन्द्र चुडाल, सारहुल भट्टराई, सोमनाथ आचार्य लगायतयात उपत्यका कमिटीया दुजः कथं मनोनित याःगु खः ।
स्रोतया कथं एमालें छगु लिपा मेगू यासें पार्टी दुनेया पहिचान पक्षधर नेतातय्त अल्पमतय् लाकीगु ज्या यानाः संघीयताया खँय् हे अनुदार जुयावनाच्वंगु दु ।
