प्याखं निर्देशक बज्राचार्य मन्त
नेपालभाषा प्याखं व ख्यालःया नांजाःम्ह निर्देशक शुभरत्न बज्राचार्य ५७ दँया बैंशय् मन्त । आइतवाः सुथय् रक्तचाप तसकं म्हो जुयाः शकय् वंम्ह बज्राचार्य वासः यायेगु लागि कीर्तिपुर अस्पताल यंकूगु खःसा आइसीयूया आवश्यकता जूगुिलं बल्खुइ च्वंगु शिवज्योति अस्पतालय् यंकूगु खः । वासः यायेगु झ्वलय् निर्देशक बज्राचार्य अन हे मदुगु खः ।
संस्कृतविद् सत्यमोहन जोशीं च्वयादीगु न्हय्गां जात्राया लोकबाखंया लिधंसाय् दयेकातःगु "लाखे क्व:थैगु" पूधाः प्याखं वय्कलं निर्देशन यानादीगु खःसा सिद्धार्थया गृहत्याग, पूगु जातः नापं आपालं नेपालभाषाया प्याखं ख्यालः आदि निर्देशन यानादीगु खः । अथेहे न्हूगु संकिपा धायेत्यंगु छु खः दयेकेगु लागि स्क्रीप्ट नापं कलाकारत तकं ल्ययेगु ज्या सिधयेकेधुंकादीम्ह बज्राचार्य नेपालभाषाया थी थी संस्था लिसे नं आबद्ध जुया वयाच्वनादीम्ह खः । पलिस्था येँया न्वकू नासः खलः किपूया सल्लाहकार जगतपाल महाविहारया दुजः नापं आपालं संस्थां ज्या यानाच्वनादीम्ह खः । मदुम्ह बज्राचार्ययात आइतवाः न्हिनय् किपूया दीखुइ अन्त्येष्टि याःगु खः ।
मदुम्ह बज्राचार्यया मां, जहान नापं स्वम्ह म्ह्याय् व छम्ह काय् दी ।
(किपा साभार - उज्यालो ९० नेटवर्क, लहना ज्याझ्वः)
