एमालेया न्हय्गू प्रदेशय् आदिवासी मोर्चाया विरोध
नेकपा (एमाले)या केन्द्रीय समितिया बैठकं बहुपहिचानया आधारय् याःगु न्हय्गु प्रदेशया प्रस्ताव प्रति आदिवासी जनजाति बृहत संयुक्त मोर्चां थःपिनिगु ध्यानाकर्षण जूगु खँ धाःगु दु ।
आइतवाः छगू प्रेस विज्ञप्ति पिथना एमालें बहुपहिचानया नांम्हे आदिवासी जनजातितय्गु ऐतिहासिक पृष्ठभुमियात अस्वीकार यायेत स्वःगु व शदियौ निसें उत्पीडनय् लानाच्वंपिं आदिवासी जनजातितय्त हानं उत्पीडनय् लाकेत स्वःगु खँ धाःगु दु ।
राज्य पुनर्संरचना समिति व राज्य पुनर्संरचना उच्चस्तरीय सुझाव आयोगं प्रस्ताव याःगु आधार व सिद्धान्त कथं संघीय नेपाःया खाका दयेकेत एमाले नापं मेपिं दलतय्त नं मोर्चां इनाप याःगु दु ।
विज्ञप्तिइ मोर्चाया माग एकल पहिचान नापं लिपा बहुपहिचानयुक्त, बहुजातीय स्वायत्त प्रदेश, स्वायत्त क्षेत्र व विशेष क्षेत्रत दयेकेगु खः धकाः न्ह्यथनातःगु दु । दक्वं नेपामिंतय्गु अस्तित्वयात स्वीकार यात धाःसा जक नेपाः दक्वं नेपाःमितय्गु मंका जुइगु खँ नं विज्ञप्तिइ न्ह्यथनातःगु दु ।
