छवाःया दुने संघर्ष समितिं न्हूगु कार्यनिति तयार याइगु
देय्या न्हूगु परिस्थितियात मध्यनजरय् तयाः नेवाः स्वायत्त राज्य मंकाः संघर्ष समितिं छवाः लिपा थःगु न्हूगु कार्यनिति तयार याइगु जूगु दु । संघर्ष समितिं आवंलि नेवाःतय्गु एजेण्डाय् ज्वःलाःपिंलिसे मोर्चा बन्दी यानाः वनीगु क्वःछिउसें पूवंक कार्यनिति छवाः लिपा तयार यायेगु निर्णय याःगु दु । आः छवाःया दुने संघर्ष समिति दुनेया झिंनिगू हे घटकय् थःथःपिनि दथुइ सहलह ब्याकाः नेवाः स्वायत्त राज्यया निंतिं न्ह्याः वनेगु रोडम्याप तयार यायेगु लँपुपाखे वनेगु तयारी याःगु दु ।
संघर्ष समितितया झिंनिगू घटकया निम्ह-निम्ह प्रतिनिधित सहित निन्हु तक नगरकोटय् जूगु कार्यशाला गोष्ठीइ नेवाःतय्गु एजेण्डा एकल जातीय पहिचानया आधारय् संघीयता, गणतन्त्र, धर्म निरपेक्षताया सवालय् ज्वःलाःगु राजनीतिक दल, जनजातिया संगठन, जातिय संगठन, छुं नं कथंया खलः पुचः व मनूतलिसे मोर्चाबन्दी यानाः वनेगु तयारी याःगु दु ।
गोष्ठीया न्हापांगु दिं संघर्ष समितिया सचिवालय् कजि मल्ल के. सुन्दरं आःया परिस्थिति, कार्यशाला गोष्ठिया आज्जु, सम्भावना व नेवाःत वनेगु लँपुया बारे थःगु बिचाः प्वंकादीगु खःसा लिपा स्वंगू पुचलय् दुथ्याका सहलह ब्याकेगु अले थःथःपिनिगु खँ तयेगु ज्या जूगु खः ।
उगु कार्यशाला गोष्ठिइ देय्या राजनीतिक अवस्थायात कयाः विश्लेषण यायेगु नापं संभावना व नेवाःतय्सं म्हितेमाःगु भूमिकाया बारे सहलह जूगु खः ।
