पंचवीर सिं सिरपाः लःल्हात
बुद्ध सम्बत २५५३ व २५५४ या पंचवीर सिं सिरपाः शनिवाः छगू ज्याझ्वःया दथुइ लःल्हात ।
येँया विश्व शान्ति विहारय् जूगु उगु ज्याझ्वलय् बु.सं. २५५३ या सिरपाः त्रिरत्न मानन्धर व बु.सं. २५५४ या सिरपाः मय्जु सुनीता मानन्धर व भाजु शाक्य सुरेनयात मूपाहां नापं धर्मोदय सभाया न्वकू पद्मज्योति कसालं उगु सिरपाःया दसिपौ लःल्हानादीगु खःसा नगद सिरपाः दाता पंचवीर सिं तुलाधरं लःल्हानादीगु खः ।
युवा बौद्ध समूहया नायः त्रिरत्न तुलाधरया सभाध्यक्षताय् जूगु उगु ज्याझ्वलय् मूपाहां पद्मज्योति कसाः, सिरपाःया दाता पंचवीर सिं तुलाधर, निर्णायकिपं गौतम वीर बज्राचार्य, लोचनतारा तुलाधर, कृष्ण प्रजापति व अमीता धाख्वाः नापं सिरपाः त्याकादीपिं त्रिरत्न मानन्धर, सुनीता मानन्धर व शाक्य सुरेनं थःथःगु नुगः खँ प्वंकादीगु खः ।
युवा बौद्ध समूहया न्वकू तेज नारायण मानन्धरं लसकुस यानादीगु उगु ज्याझ्वलय् निर्णायकपिन्त दाता पंचवीर सिं तुलाधरपाखें मतिनाया चिं कथं बुद्धया मूर्ति लःल्हानादीगु खः । ज्याझ्वः भिक्षु निग्रोधपाखें शील प्रार्थना यानाः ह्याःगु खः ।
नेपालभाषाया न्हिपौ "सन्ध्या टाइम्स"य् पिदंगु दच्छियंकया बौद्ध धर्म सम्बन्धि च्वसूयात मूल्यांकन यानाः उत्कृष्ट च्वसु च्वयादीम्ह छम्ह भाजु व छम्ह मय्जुयात थुगु सिरपाः बिया वयाच्वंगु खः ।
