आदिवासीया माग सम्बोधन यायेत काँग्रेसं सुझाव समिति नीस्वन

आदिवासी जनजातिं ह्वना वयाच्वंगु मागयात गुकथं सम्बोधन याःगु धाइगु विषयस सुझाव बिइगु नितिं नेपाली काँग्रेसं केन्द्रीय दुजः भीमबहादुर तामाङया संयोजकत्वलय् सुझाव समिति नीस्वगु दु । बिहिवाः च्वगु पार्टीया केन्द्रीय समितिया वैठकं उगु समिति गठन याःगु खः ।
समितियात पार्टीया नीति कार्यक्रम व घोषणापत्रयात आधार दयेका सुझाव बिइगु भाला पार्टीं बिइगु खँ स्रोत धाःगु दु । मू कथं राज्य पुनःसंरचना मुद्दालय् थःगु पार्टी दुने व पिने च्वपिं आदिवासी जनजाती नेतात व संस्थागतकथं वयाच्वंगु असन्तुष्टियात सम्बोधन यायेत काँग्रेसं उगु सुझाव समिति नीस्वगु खः । थ्व समितिं लच्छि दुने थःगु सुझाव बिइ ।
नेपाल आदिवासी जनजाति संघ नापं थीथी संस्थाया प्रतिनिधितय्सं पार्टीयात बिइगु ज्ञापनपत्र, पार्टी नीति व कार्यक्रम नापं संविधानसभाया निर्वाचनलय् प्रस्तुत पार्टीया घोषणापत्रयात आधार दयेका समस्या समाधानया नितिं उगु समितिं सुझाव बिइगु खँ पार्टीं धाःगु दु । उगु समितिलय् दुजः कथं केन्द्रीय दुजः महेश आचार्य, नरहरि आचार्य, डा मीनेन्द्र रिजाल, मानबहादुर विश्वकर्मा, उमाकान्त चौधरी, भीष्मराज आङ्देम्वे, अजयकुमार चौरसिया, गगनकुमार थापा, सीता गुरुङ र लक्ष्मी राई दुथ्याःगु दु