जनजाति व मधेसी नेतातय् दथुइ न्हुगु पार्टी नीस्वनेगु विषयस सहलह
आदिवासी जनजाति, मधेसी दलित व उत्पीडनया मुद्दायात पार्टींयम मू मू नेतातय्सं सम्बोधन मयाःगु धासें नेकपा (एमाले)या असन्तुष्ट नेतातय्सं न्हूगु रणनीति दयेकेत सहलह न्ह्याकूगु दु । धौख्यःया मिराबोल रिसोर्टय् आदिवासी जनजाति नापं मधेसी नेतात न्हूगु पार्टी नीस्वनेगु वा मेगू विकल्पय् वनेगु विषयस सहलह केन्द्रित जूगु खँ स्रोतं धाःगु दु । एमालें एकल जातीय पहिचान दुथ्याःगु संघीयता स्वीकार्य यायेफइ मखुगु धापु पिथनेधुंकाः असन्तुष्ट आदिवासी जनजाति व मधेसी नेतातय्सं वइगु शुक्रवाः तक छु यायेगु धाइगु विषयस निर्णयलय् थ्यनेगु खँ पोलिटव्युरो दुजः पृथ्वी सुब्बां धायादिगु दु ।
बैठकं राष्ट्रिय कार्यकर्ता भेलाय् आदिवासी जनजाति व मधेसीया विरुद्ध माहौल दयेकेगु निंतिं जक याःगु निष्कर्ष पिकाःगु दु । उखे पार्टीं राष्ट्रिय भेलालय् ब्वति मकापिं नेतातय्तं स्पष्टिकरण कायेगु धाःगु दु ।
स्रोतया कथं बैठकय् उपाध्यक्ष अशोक राई, रामचन्द्र झा, पृथ्वी सुब्बा गुरुङ, मो.रिजवान अन्सारी, राजेन्द्र श्रेष्ठ, रकम चेम्जोङ, सत्रुघ्न महतो, किरण गुरुङ, दलबहादुर राना मगर, हेमराज राई, बीरबहादुर लामा व गोपाल ठाकुर नापं २२ म्ह ब्वति दुगु खः ।
