सत्ताय् केन्द्रीत जूगुलिं सार्वभौम संविधानसभा विघटन जूगु : राष्ट्रपति
राष्ट्रपति डा. रामवरण यादवं देशया निकासया लागि उच्चस्तरीय सहमति यायेत दलतय्त इनाप यानादीगु दु ।
विघटित संविधानसभाय् दुगु तःधंगु दलया शीर्ष नेतातलिसे थौं नापलायेगु झ्वलय् राष्ट्रपति डा. यादवं उकथं इनाप यानादीगु खः । वय्कलं संविधानसभा मदयेधुंकाः संवैधानिक नापं राजनैतिक मुद्दायात स्वभाविक कथं निकास बीत बैधानिक संयन्त्र मदुगु धयादिसें दलीय सहमती बः बियादीगु दु ।
राष्ट्रपति डा। यादवं थुगु अवस्थाय् देशया राजनीतियात हाकनं लोकतान्त्रिक पद्दतिइ हयाः विधिया शासनयात निरन्तरता बीत जनआन्दोलन व अन्तरिम संविधानया मर्म कथं फुक्क राजनीतिक शक्तित थःथवय् विश्वास सदभाव व सहमति यायेमाःगु तसकं आवश्यक जूगु धयादिल ।
वय्कलं लोकतान्त्रिक गणतन्त्रया उपलब्धिया रक्षाया लागि देशयात केन्द्र बिन्दु दयेकाः सहमति यायेमाःगु आःया आवश्यकता जूगु न्ह्यथनादिसें सर्वोच्च अदालतया उजंयात दलतय्सं गम्भिर कथं मकासे सरकार दयेकेगु व क्वथलेगु ज्याय् केन्द्रीत जूगुिलं सार्वभौम संविधानसभा विघटन जूगु धयादिल ।
राष्ट्रपति डा. यादवं देशय् सामाजिक सदभाव स्यनीगु चिन्ता जनतायाके दयाच्वंगु धयादिसें सामाजिक सदभाव ल्यंकातयेत तकं इनाप यानादिल ।
मुँज्याय् एकीकृत नेकपा माओवादीया नायः पुष्पकमल दाहाल प्रचण्ड, नेकपा एमालेया नायः झलनाथ खनाल, नेपाली कांग्रेसया सभापति सुशील कोइराला, राप्रपाया नायः पशुपति शम्सेर राणा, राप्रपा नेपालया नायः कमल थापा लिसें उप-राष्ट्रपति परमानन्द झा व प्रधानमन्त्री डा. बाबुराम भट्टराईया नं सहभागिता दुगु खः ।
