शेर्पायात याःगु कारवाहीयात कयाः प्यखेरं विरोध
नेकपा एमालेया न्वकू अशोक राईं नेपाल आदिवासी जनजाति महासंघया मू छ्यान्जे आङ्गकाजी शेर्पायात याःगु कारवाही लित कायेत नेतृत्वयात इनाप यानादीगु दु । वय्कलं आङ्गकाजीयात याःगु कारवाही आदिवासी जनजाति व उत्पीडित समुदायया अधिकार कायेगु लागि याःगु गतिविधिया पूर्वाग्रही जूगु नं ठहर याःगु दु ।
आइतवाः न्वकू राईपाखें छगू विज्ञप्ती पिथनादिसें स्पष्टिकरणया ह्वःताः तकं मबिउसे आदिवासी जनजाति महासंघया मू छ्यान्जेया हैसियतं उत्पीडित आदिवासी जनजाति अधिकारलिसे सम्बन्धित जुयाः बिउगु अभिव्यक्तियात लक्षित यानाः कारवाही याःगु धाःगु दु ।
अथेहे शेर्पायात पार्टी सदस्यता तकं मदइगु कथं कारवाही यायेगु लज्जास्पद ज्या जूगु नेपाल आदिवासी जनजाति महासंघया ठहर दु । महासंघं शेर्पायात जातीय मुद्दा ल्ह्वंगु व जातियताया प्रतिनीधित्व यानाः एकीकृत नेकपा माओवादीया आमसभाय् न्ववाःगु लिधंसाय् पार्टीं निष्काशन याःगुिलं आपत्ति प्वंकूगु दु ।
महासंघया नायः राजकुमार लेखीं थौ छगू विज्ञप्ती पिथसें संघीयता विरोधीतय्सं संघीयताया पक्षधरतय्त व आदिवासी जनजातितय्त चीकेगु अभियान न्ह्याकूगु थुगु घटनापाखें पुष्टि जूगु नं धाःगु दु ।
थ्वहे झ्वलय् संघीयता व नागरिकया अधिकारया पक्षधरतय्त प्यंगू राजनीतिक शक्ति त्वःताः न्हूगु राजनैतिक शक्ति दयेकेगु लँपुइ न्ह्यज्यायेत नं उगु विज्ञप्तीपाखें अपील याःगु दु ।
लुमंकेबहःजु माओवादीं चकंदबुलिइ याःगु आमसभाय् ब्वति काःगु धासें नेकपा एमालें महासंघया मू छ्यान्जे शेर्पायात सदस्यता तकं मदइगु कथं कारवाही याःगु खः ।
