कांग्रेसया जनजाति नेतातय्सं पार्टीया ज्याझ्वः बहिष्कार याइगु
नेपाली कांग्रेसया आदिवासी जनजाति नेतातय्सं पार्टीया फुक्कं ज्याझ्वः बहिष्कार यायेगु निर्णय याःगु दु ।
कांग्रेसया आदिवासी जनजाति संघया सभापति इन्द्रबहादुर गुरुङया सभापतित्वय् शनिवाः च्वंगु जनजाति नेतातय् मुँज्यां थःपिनि झिंछगू बुँदे ज्ञापनपौया बारे पार्टी नेतृत्वं सम्बोधन मयागु धासें पार्टीया छुं नं ज्याझ्वलय् ब्वति मकायेगु निर्णय याःगु खः ।
मुँज्या लिपा पार्टीया पुलांपिं जनजाति सभासद् व थीथी जातिय संगठनया प्रतिनिधितय्सं मंकाः कथं पिथंगु विज्ञप्तिइ पार्टीया फुक्कं ज्याझ्वलय् ब्वति मकायेत पार्टी दुनेया पहिचान सहितया संघीयता पक्षधर नेतातय्त इनाप याःगु खः ।
जनजाति नेतातय्सं वंगु चैत २४ गते पार्टी सभापति सुशील कोइरालायात झिंछगू बुँदे ज्ञापनपौ लःल्हाःगु खः । उगु इलय् सभापति कोइरालां उगु मागयात पार्टीया केन्द्रीय मुँज्याय् यंकेगु प्रतिबद्धता प्वंकूगु खःसां केन्द्रीय मुँज्याय् उगु विषय हे प्रवेश मयाकेवं जनजाति नेतात आक्रोशित जूगु खः ।
