'माओवादीपाखें सहमतिया निंतिं पार्टी दुने व पिनेया शक्तियात आव्हान'
एकीकृत नेकपा (माओवादीं) राष्ट्रिय राजनीतिया निंतिं सहमति यायेत थीथी राजनीतिक दलतय्त आव्हान याःगु दु । नापं पार्टी दुनेया आन्तरिक विवाद ज्यंकेत वार्तापाखें सहमति मालेत पार्टी दुनेया असन्तुष्ट पक्षयात नं आव्हान याःगु दु ।
माओवादीं शुक्रवाः पहिचान सहितया संघीय संविधानया निंतिं येँया खुल्लामञ्चय् याःगु जनसभायात सम्बोधन यानादिसें पार्टी अध्यक्ष पुष्पकमल दाहाल 'प्रचण्डं' सहमतिया विकल्प मदुगु धयादिसें आः न्हूगु ढंगं सहमति यायेमाःगु न्ह्यथनादिल । नापं वय्कलं सभाय् आपालं मनूतय्सं ब्वति काःगु मतलव माओवादी पार्टी छप्पँ जुइमाः धकाः थःम्ह थुइकाःगु धयादिसें पार्टीया असन्तुष्ट पक्षयात नं सहमति यानाः पार्टीयात छप्पँ यायेत इनाप यानादिल ।
वय्कलं माओवादीं पहिचान सहितया संघीयताय् सम्झौता याःगु खःसा थः जक मखसें पार्टीया हे अस्तित्व संकटय् लाइगु सम्भावना न्ह्इथनादिसें थःम्ह काःगु अडानयात जनता सभा बिउगु धयादिल ।
अथेहे वय्कलं माओवादीया सभा व २७ दल व राप्रपा नेपालया सभाया तुलना यानाः धयादिल, 'वय्कःपिंसं म्ये हाःगु व माओवादीं सुलि पूगुलि गुलि पाः थ्व थुइकुसाः गाः ।'
सभाय् माओवादी उपाध्यक्ष नापं प्रधानमन्त्री डा. बाबुराम भट्टराईं संविधानसभापाखें संविधान निर्माण जुइमफुगु प्रति क्षमाफ्वनादिल । वय्कलं न्हूगु संविधानसभा निर्वाचनया विकल्प मदुगु धयादिसें सरकारं सर्वच्च अदालतया कथं निर्वाचनया घोषणा यानाः देय्यात शुन्यताय् वनेगु पाखें बचे याःगु धयादिल ।
वय्कलं नं राजनीतिक दलत दथुइ सहितया विकल्प मदुगु धयादिसें चुनावया घोषणा असंवैधानिक जूगु धकाः छुंछुं राजनीतिक दलतय्सं राष्ट्रपतियात माघ १८ व असोज १९या थें यायेत इनाप यानाच्वंगु धयादिल ।
अथेहे सभाय् मेम्ह उपाध्यक्ष नारायणकाजी श्रेष्ठ 'प्रकाशं' दलत दथुइ संविधानसभा विघटन याये न्ह्यः प्यंगू विकल्प दुगु तर विपक्षी दलतय्सं छुं हे विकल्प स्वीकार यायेत तयार मजूगुलिं संविधानसभा विघटन जूगु धयादिल । वय्कलं संविधानसभाया न्हूगु निर्वाचन यायेत विपक्षी दलत दथुइ नं सहमति जूगु न्ह्यथनादिसें आः वयाः इमिसं जनतायात झंगः ल्हानाच्वंगु धयादिल ।
सभाय् नेवाःत नापं नागरिक समाजयापाखें न्ववानादिसें मल्ल के सुन्दरं संविधानसभा विघटन लिपा महाभारत शुरु जूगु धयादिल । वय्कलं महाभारतया युद्धय् कृष्ण सुया पक्षय् दुगु खः वयाः हे विजय जूगु धयादिसें नेपाःया सन्दर्भय् जनता हे कृष्ण जूगुलिं थुगु युद्ध पहिचान सहितया संघीयता पक्षया जनताया विजय जुइगु धयादिल ।
अथेहे आदिवासी जनजाति महासंघया महसचिव काङकाजी शेर्पा, मधेश अधिकारकमी तुलनारायण शाह, दलित नेता पद्मलाल विश्वकर्मा लगायतं नं थःथःगु बिचाः प्वंकादीगु खः ।
