एमालें जनजाति व मधेसीयात औपचारिक कथं ब्वन
पार्टी दुनेया जनजाति व मधेसी नेतातय्गु दबावया हुनिं एमाले स्थायी समितिं जनजाति व मधेसीतय्तं पार्टीं औपचारिक कथं सहलह यायेत ब्वनेगु ज्या याःगु दु ।
जनजाति व मधेसीतय्सं थःगु मागयात पार्टी औपचारिक कथं सम्बोधन मयाःगु धासें असन्तुष्ट नेतातय्सं एमालेया बैठक बहिष्कार यानावयाच्वंगु खः । एमाले आधिकारीक रूपं जातीय पहिचान दुथ्याःगु संघीयता पार्टीं पारित यायेधुंकूगु खःसां पार्टी नेतृत्वं स्वीकार मयाःगु धासें जनजाति व मधेसी नेतात असन्तुष्ट जुयाच्वंगु खः । जातीय पहिचान दुथ्याःगु संघीयता स्वीकार मयाःगुलिं हे संविधानसभा विघटन जुगू द्वपं नं जनजाति व मधेसी नेतातय्सं बियाच्वंगु दु ।
उपाध्यक्ष अशोक राई, पोलिटब्यूरो दुजः पृथ्बी सुब्बा गुरुङ, बिजय सुब्बा, राजेन्द्र श्रेष्ठ, किरण गुरुङ, बीरबहादुर लामा नापं मेमेपिं नेतातय्सं स्थायी समिति, पोलिटब्यूरो व केन्द्रिय समितिया बैठक बहिष्कार यानावयाच्वंगु खः ।
स्थायी समितिया सोमवाःया बैठकय् संघीयता व जनजाति व मधेसीतय्सं ल्ह्वनाः वयाच्वंगु मुद्दाया विषयस गहन सहलह जुगू व स्थायी समिति बैठकं नेतातय्गु कार्य विभाजनय् हेरफेर व जुगू खँ सचिव शंकर पोखरेल कनादिल ।
