'पहिचान पक्षधरत छप्पँ जू'
नेपालभाषाया भाषिक कार्यकर्तातय्सं देय् अतिकं संघीन इलय् दुगु खँ न्ह्यथंसें फुक्कं पहिचान सहितया पक्षधरतय्त छप्पँ जुयाच्वनेत इनाप याःगु दु ।
नेवाः न्ह्यलुवा, नेवाः पत्रकार नापं नेवाः कार्यकर्तातय्सं सोमवाः छगू मंकाः विज्ञप्ति पिथनाः पहिचान दुथ्यागु संविधान दयेकेगु अभियानलय् एकीकृति कथं न्ह्यावनेत इनाप याःगु खः ।
'थुगु ऐतिहासिक इलय् सकल आदिवासी जनजाति, दलित पिंछडा वर्ग व बहिष्करणय् लाःकातपिं सकल समुदायया पहिचान पक्षधर शक्तिया एकता अपरिहार्य जू' विज्ञप्ति न्ह्यथनातःगु दु ।
विज्ञप्तिइ देय् पहिचान दुगु संघीयता व संघीयता विरोधी यानाः निगू खेमाय् धुवीकृत जुयाच्वंगु न्ह्यथंसें विज्ञप्तिइ थुगु इलय् संघीय पक्षधर राजनीतिक दल, भाषिक व जातीय संघ संस्थाया विभाजनं पहिचानया आन्दोलनयात कमजोर दयेकेगु जुया एकीकृत जुया न्ह्यावनेत इनाप याःगु दु ।
