सरकारयात आन्दोलनपाखें क्वःथलेगु विपक्षी दलतय् ख्याच्वः
एकीकृत नेकपा (माओवादीं) सत्ता मत्वःतुसा आन्दोलनपाखें सरकार क्वःथलेगु ख्याच्वः विपक्षी दलतय्सं बिउगु दु । माओवादीं सर्वसत्तावाद लादे यायेत स्वःगु व सत्ता कब्जा यायेत्यंगु धासें उकीया विरोध यासें २७ दलतय्सं आन्दोलनया बलं सरकारयात पुलिं चुइकेगु ख्याच्वः बिउगु खः ।
सरकारय् दुमथ्याःगु नेपाली कांग्रेस, नेकपा (एमाले), राष्ट्रिय प्रजातन्त्र पार्टी, राष्ट्रिय जनशक्ति पार्टी, नेकपा (माले) लगायत दलतय्सं शुक्रवाः खुल्लामञ्चय् याःगु बृहत्त जनसभाय् वक्तातय्सं माओवादीं सत्ता कब्जा यायेत स्वःगु व माओवादीया हे हुनिं संविधानसभा विघटन जूगु दावी याःगु खः ।
सभाय् कांग्रेस सभापति सुशील कोइरालां संसरय् तनाशाहतय् पतन जुयावंगु दसुत दुगु धासें माओवादी नं थः हे पतन जुइगु धयादिल । माओवादीं न्ह्यावलें बेइमानी याःसां थःपिं सहमतिया निंतिं च्वनाच्वंगु तर लिप्पांगु इलय् माओवादीं सहमतिया राजनीति त्वाःथःगु धयादिल ।
एमाले अध्यक्ष झलनाथ खनालं वर्तमान कामचलाउ सरकारं चुनावया घोषणा यानाः नौटंकी याःगु धयादिसें थज्याःगु पलापाखें देय्यात संकटय् यंकीगु धयादिल ।
कांग्रेस नेता शेरबहादुर देउवां माओवादीं स्वयां थःम्हं थःगु कार्यकालय् जनजातिया निंतिं यक्व ज्या यानागु दावी यानादिसें नेवाः राज्यया इञ्चार्जय् झक्कु सुवेदीयात तइगु माओवादी गुकथं जनजातिवाद जुल धकाः न्ह्यसः तयादिल ।
ज्याझ्वलय् पुलापिं प्रधानमन्त्रीत सूर्यबहादुर थापा, लोकेन्द्र बहादुर चन्द, माधवकुमार नेपाल नापं एमाले नेता केपी शर्मा ओली, कांग्रेस नेतात प्रकाशमान सिंह, भीमबहादुर तामाङ लगायत चिधंगु दलया नेतातय्सं नं न्ववानादीगु खः ।
