फोरम विभाजन व सरकारया भविष्य

सरकारय् दुहां वनेगु खँयात कयाः पिहां वःगु विवादयात कयाः अन्ततः मधेशी जनअधिकार फोरम कुचा जूगु दु । पार्टी नेतातय्सं फोरम कुचा जुल धकाः औपचारिक रुपं मधाःसां विधि कथं धाःसा फोरम कुचा हे जूगु दु । आः पार्टी कुचा जुइ सातकि निगू फोरम मध्यय् गुगुपति आधिकारिक खः गुम्ह नेतायाके गुलि सभासद् दु धइगु खँ धाःसा आः तक स्पष्ट मजूनि । तर थ्व नं याकनं स्पष्ट जु हे जुइ जुइ ।

तर फोरमया थ्व विभाजनं यानाः दकलय् तःधंगु लिच्वः धाःसा माधव नेपालया सरकारयात लाः वःगु दु । वय्कःया सरकारयात समर्थन यानाच्वंगु पार्टीत मध्यय् फोरम दकलय् महत्वपूर्ण खः । छुं जुयाः आः फोरम विभाजित जुयाः विजय गच्छेदारया पक्षय् म्हो जक सभासद लाः वन धाःसा सरकारयात बहुमत खाकेत हे गाक्क सभासद् दइ मखु । गुकिं यानाः संसदय् बहुमत सिद्ध याइगु इलय् हे सरकार क्वःदलीगु सम्भावना दु । यद्यपि अझ नं नेतातय्सं फोरम विभाजनपाखें सरकारयात लिच्वः लाइ मखु धकाः हे दावी यानाच्वगु दनि । फोरम अध्यक्ष उपेन्द्र यादवयात यदि सभासद खाके फत धाःसा प्रधानमन्त्री जुयाः सरकार चले यायेगु 'अफर’ माओवादीं बियाच्वंगु दु । उकिं फोरम थम्हं हे सरकार चले यायेगु अवसर वयाच्वंगु थ्व इलय् एमालेया क्वय् च्वनाः मन्त्री जुइपिनि ल्याः म्हो जक दः वनीगु सम्भावना यक्व दु । थ्व अर्थय् यादवं गच्छदारया मनूत नं थःपाखे सालीगु सम्भावना दु । थ्व स्थितिइ देशय् सरकार गठनया न्हूगु समीकरण निर्माण जुइगु नं सम्भावना नं उतिकं पिहां वःगु दु । थ्व फुक्क प्रकरणया दथुइ शान्ति प्रकि्रया संविधान निर्माण थेंज्याःगु ज्या हानं लिज्यां वनीगु धाःसा निश्चित दु ।

More Stories Like this