न्हूगु विकल्प ल्ययेमाःगु ई वल : एमाले उपाध्यक्ष राई
उत्पीडित जनतायात न्याय बिइगु निर्णायक इलय् नेकपा (एमाले)या मू मू नेतातय्सं घात याःगु द्वपं नेकपा एमालेया आदिवासी जनजाति नेतातय्सं बिउगु दु ।
बिहिवाः जूगु छगू विचार गोष्ठीइ एमाले उपाध्यक्ष अशोक राईं पहिचानसहितया संघीयतालय् वनेत पार्टीया मू मू नेतातय्सं अस्वीकार यायेधुंकाः पार्टीप्रति विश्वास म्हो जुयावंगु खँ धयादिल । देय्या मू मू पार्टीया नेतात असफल जुइधुंकाः न्हू विकल्प ल्ययेमाःगु ई वगु खँ नं वय्कलं धयादिल ।
अथेहे उगु ज्याझ्वलय् एमालेया पोलिटब्युरो दुजः पृथ्वी सुब्बा गुरुङं संविधान विघटन यायेत एमाले व कांग्रेस लगे जूगु व माओवादीं बेइमानी याःगु द्वपं बियादिल । 'एमाले व कांग्रेसं उत्पीडितयात घात यात व माओवादीं बेइमान यात' पोलिटब्युरो दुजः गुरुङं धयादिल ।
गुरुङं उत्पीडितय्गु पार्टी नीस्वनेमाःगु खँ धयादीगु खँय् बः बियादीगु खः । ज्याझ्वलय् एमाले केन्द्रीय दजुः रकम चेम्जोङ, गोपाल ठाकुर, रिजवान अन्सारी ब्वति दुगु खः ।
