कांग्रेसया जनजाति नेतातय्सं आमसभा बहिष्कार याइगु
नेपाली कांग्रेस सम्बद्ध आदिवासी जनजाति नेतातय्सं चैत जेठ २६ गते कांग्रेस, एमाले लगायत विपक्षी दलतय्सं येँया खुल्लामञ्च नापं देय्या थीथी थासय् याइगु आमसभा व विरोध प्रदर्शन बहिष्कार यायेगु ख्याच्वः बिउगु दु ।
कांग्रेस सम्बन्धीत थीथी जनजाति संघ संस्थाया प्रतिनिधितय्सं जेठ २४ गते सभापति सुशील कोइरालायात लःल्हाःगु ११ बुँदे ज्ञापन पौपतिइ दुथ्याकातःगु मागत सम्बोधन मजूसाः सभाय् ब्वति मकायेगु व पहिचन सहितया संघीयता पक्षधरतय्त नं ब्वति मकायेत इनाप याःगु दु ।
कांग्रेसया नेपाल आदिवासी जनजाति संघ, नेपाल राष्ट्रिय मगर संघ, नेपाल तामाङ संघ, नेपाल लिम्बु संघ, नेपाल लोकतान्त्रिक शेर्पा संघ, लोकतान्त्रिक नेवाः खलः, नेपाल किराँत आदिवासी जनजाति समाज नापं छुं छुं पुलांपिं सभासद्तय्सं बिहीवाः मंकाः कथं पिथंगु विज्ञप्तिइ अज्याःगु ख्याच्वः बियातःगु खः ।
जनजाति नेतातय्सं जेठ २४ गते पहिचान सहितया संघीयता स्वीकार यायेत कांग्रेस सभापति कोइरालायात ज्ञापन पौ लःल्हाःगु खः । ज्ञापन पौ लःल्हायेगु झ्वलय् सच्छि स्वयां अप्व जनजाति नेतातय्सं पार्टीं पहिचान सहितया संघीयता स्वीकार मयाःसा थःपिंसं पार्टीं राजीनामा बिइगु तकं ख्याच्वः बिउगु खः ।
