वानया विशेषदूत ताम्रातं प्रचण्ड नापलात
संयुक्त राष्ट्रसंघया महासचिव वान कि मुनाय विशेषदूत स्यामुअल ताम्रात व एनेकपा (माओवादी)या नायः पुष्पकमल दाहाल 'प्रचण्ड' दथुइ समसामयिक राजनीतिक विषयस खँल्हाबंला जुल ।
लाजिम्पाटस्थित प्रचण्डया छेँय् थ्यंकादीम्ह ताम्रात व प्रचण्ड दथुइ संविधानसभा विघटन व वयाः लिपा निर्माण जूगु राजनीतिक परिस्थितिया बारे खँल्हाबंला जूगु खः ।
खँल्हाबंलाया झ्वलय् प्रचण्डं थःपिंसं संविधान निर्माणया झ्वलय् अधिक्तम लचकता क्यनागु खःसां पहिचान सहितया संघीयताय् मेगू दलतय्सं सहमति मयागुलिं संविधानसभा विघटन जुइमाःगु खँ धयादीगु खः ।
ताम्रातं न्हूगु संविधान निर्माण मयायेकं संविधानसभा विघटन जूगु प्रति दुःख प्वंकादिसें राजनीतिक सहमति कथं हे न्ह्याः वनेत प्रचण्डयात इनाप यानादिल । लिसःलय् प्रचण्डं थः राजनीतिक सहित यानाः वनेगु पक्ष हे दुगु खँ न्ह्यथनादीगु खः ।
