पहिचान लिसेंया संघीयता स्वीकार यायेत कांग्रेसयात दबाब
नेपाली कांग्रेसया आदिवासी जनजाति नेतातय्सं पहिचानलिसेंया संघीयता स्वीकार मयाःसा पार्टी त्वःतेगु ख्याच्वः बिउगु दु ।
पुलांपिं सभासद व आदिवासी जनजाति संगठनया प्रमुखत लिसें १२२ म्ह महाधिवेशन प्रतिनीधिपिन्सं बुधवाः पार्टी सभापति सुशील कोइरालयात ज्ञापन पौ लःल्हाःगु दु । उगु ज्ञापन पतिइ पहिचान लिसेंया संघीयताया मुद्दायात सम्बोधन यायेत न्ह्यथनातःगु दु ।
उमिसं समानुपातिक प्रतिनीधित्व, जातिय जनसंख्याया लिधंसाय् पूर्ण समानुपातिक निर्वाचन प्रणाली, बहुभाषिक नीति जुइमाःगु तकं माग याःगु दु । आदिवासी जनजाति नेतातय्सं सरकार विरुद्धया मोर्चाबन्दीया नामय् संघीयता विरोधीतलिसे तकं गठबन्धन याःगु धासें २६ गते जुइगु आमसभा तकं बहिष्कार यायेगु ख्याच्वः बिउगु दु ।
ज्ञापन पौ लःल्हाना कयादिसें सभापति कोइरालां थः न्ह्याबलें आदिवासी जनजातिया पक्षय् दुगु धयादिसें आदिवासी जनजातिया भूमिका महत्वपूर्ण जूगु धयादिल । नापं कांग्रेस गबलें नं आदिवासी जनजाति विरुद्ध मवंगु नं सभापति कोइरालां दावी यानादिल ।
