सहमति जूसाः संविधानसभा पुनःस्थापना : प्रचण्ड
एनेकपा (माओवादी)या नायः पुष्पकमल दाहाल 'प्रचण्डं' दलतय् दथुइ सहमति जूसाः राष्ट्रपति मार्फत संविधानसभा पुनःस्थापना यानाः न्हुगु संविधान जारी यायेफइगु खँ धयादीगु दु ।
संविधानसभा विघटन लिपा न्हूगु राजनीतिक परिस्थितिया बारे नागरिक समाज, उद्योग व्यवसायी, कलाकार लगायत थीथी ख्यःया व्यक्तित्व नाप मंगलवाः याःगु अन्तरक्रियाय् प्रचण्डं राष्ट्रपति, कांग्रेस व एमालेया नेता नाप संविधानसभा पुनःस्थापना यायेगु वा न्हूगु चुनावय् वनेगु धइगु विषयस सहलह यानाच्वंगु धयादिल । वय्कलं संविधानया विवादित विषयस सहमति यानाः राष्ट्रपति मार्फत सविधानसभा पुनःस्थापना यायेफइगु खँ धयादिल ।
संविधानसभा मार्फत संविधान दयेकेगु निंतिं माओवादीं खतरा मोले यानाः सेना समायोजन यानाःगु तर पुरातनवादी दलतय्सं अवरोध याःगु व सहमति कथं मेमेगू पार्टीतय्सं भूमिका निर्वाह मयाःगु धयादिल । संविधान दयेकेत माओवादीं हदै तक लचिलो जुयाः नेवाः-बाग्मती थंज्याःगु बहुजातीय प्रदेश कथं नां तयेगु विषयस कांग्रेसया ससदीय दलया नेता रामचन्द्र पौडेल व महामन्त्री कृष्ण सिटौला व एमालेया नायः झलनाथ खनाल व माधवकुमार नेपाल नापं सहमति जुगु खँ नं धयादिसें तर अज्याःगु सहमति जेठ १४ गते बहनी जुइवं वय्कःपिंसं न्यने तकं चाहे मजूगु धयादिल ।
