पुलांपि सभासद्तय् कूटनीतिक राहदानी लितकाइगु
सभासद्या पदपाखें जिम्मेवारी मुक्त जुपिं सभासदतय्गु कूटनीतिक राहदानी परराष्ट्र मन्त्रालय व व्यवस्थापिका संसदया सचिवालयं लित काइगु जूगु दु । राष्ट्रिय सतर्कता केन्द्रं कूटनीतिक राहदानी दुरूपयोग जुइफइगु धासें पुलापिं सभासदतय्गु राहदानी लित कायेत्यगु खः । स्रोतया कथं परराष्ट्र मन्त्रालयं कूटनीतिक राहदानी लित कायेगु ज्या न्ह्याकेत राहदानी कयातःपिं सभासदपिनिगु नां धलः दयेकाच्वंगु दु । प्रयोजन फुइधुंकाः कूटनीतिक राहदानी लित बिइमाःगु प्रावधान दुसां नं सभासद्तय्सं नियम पालन याःगु धाःसा खनेमदु ।
दच्छि न्ह्यः सभासदतय् कूटनीतिक राहदानी दुरुपयोग यानाः मेपिं हे विदेशय् छ्वयाच्वंगु लुइवं सतर्कता केन्द्रं पुलापिं सभासद्तय् कूटनीतिक राहदानी लितकायेगु ज्या न्ह्याकेत निर्देशन बिइगु खः ।
