"धिमे पौ"या स्वर्ण ल्याःया पितब्वज्या
ज्यापु समाजया ख्वाःपौ "धिमे पौ"या स्वर्ण ल्याः शनिवाः छगू ज्याझ्वःया दथुइ पितब्वज्या जुल । ज्यापु समाजया भवन यलय् जूगु उगु उलेज्याझ्वलय् समाजया नायः रामकाजी अवालें पितब्वज्या यानादीगु खः ।
"धिमे पौ" पिथना पुचःया संयोजक सन्तमान महर्जनया सभाध्यक्षताय् जूगु उगु ज्याझ्वलय् धिमेपौया संस्थापक रत्नलाल महर्जन, विज्ञापनदाता आशाकाजी महर्जन, समाजया प्रथम उपाध्यक्ष मंगल महर्जनं धिमेपौया बारे थःथःगु नुगः खँ प्वंकादिसें भिन्तुना देछानादीगु खः ।
राष्ट्रिय संचार क्षेत्रय् नेवाःतय्गु पहुँच अप्वः मदुगु इलय् धिमय् पौ नं सशक्त भूमिका म्हिता वयाच्वंगु व नेवाःतय्गु मंकाः सः ल्ह्वनेगु ज्या यानावयाच्वंगु खँ धिमय् पौ पिथना पुचः प्रकाशन तथा प्रचार प्रसार उपसमिति धाःगु दु ।
संचार माध्यमया युगय् नेवाःतय्सं संचार माध्यमयात छगू सशक्त हतियार कथं यंकेमफुगु वा चायेका धिमय् पौ उगु इलय् नीस्वगु खँ पिथना पुचः धाःगु दु । नापं जातिय पहिचान सहित नेवाः राज्य हयेत धिमये पौ निरन्तर न्ह्यानाच्वंनेगु व नेवाःतय्गु साझा पौ कथं न्ह्यागु खँ पिथन पुचः धाःगु दु ।
ज्याझ्वलय् प्रचार प्रसार कवःया संयोजक बाबुराजा महर्जनं लसकुस यानादीगु खः ।
