एमालेया जनजाति नेतातपाखें मुँज्या बहिष्कार
नेकपा (एमाले)या जनजाति नेतातय्सं पुलांपिं सभासदतय्गु मुँज्या बहिष्कार याःगु दु । पृथ्वी सुब्बा गुरुङ्ग, किरण गुरुङ्ग, रामचन्द्र झा, गोपाल ठाकुर लिसेंया आदिवासी जनजाति पुलांपिं सभासदतय्सं मुँज्या बहिष्कार याःगु खः ।
आदिवासी जनजाति, मधेसी। मुस्लिम लिसेंया समुदाययात अधिकार वयेत्यंगु इलय् नेतृत्व पुचलं धोका बिउगु नापं पहिचानलिसेंया संघीयताया विपक्षय् च्वंगु धासें एमालेया आदिवासी जनजाति नेतातय्सं पार्टी त्वःतेगु तयारी याःगु खः ।
शुक्रवाःया मुँज्यायात बहिष्कार यानादीम्ह पुलांम्ह सभासद गोपाल ठाकुरं थःपिनिगु खँया सुनुवाइ मजूथासय् वनेगुया छुं अर्थ मदुगु धयादीगु दु ।
मुँज्याय् नायः झलनाथ खनाल व वरिष्ठ नेता माधव कुमार नेपालं पार्टी नेतृत्व सकलसिगु सः न्यनेत तयार दुगु धासें पार्टी मत्वःतेत आदिवासी जनजाति नेतातय्त इनाप यानादीगु दु । शीर्ष नेतातय्सं सभासदतय्त एमालें संकटकाल तयाः जूसां बचे यायेत कुतः याःसा नं माओवादीं छक्वलं न्हूगु चुनावया घोषणा याःगु धाःगु दु ।
नेतातय्सं पुलांपिं सभासदतय्त संविधानसभा विघटन यायेमाःगु कारणया बारे जनतायात प्रष्ट यायेत व पार्टीया नीति ज्वनाः गांगामय् वनेत तकं इनाप यानादिल ।
