'संघर्ष समितियात न्हूगु ढंगं मोर्चा दयेकाः यंकेमाः'
नेवाः स्वायत्त राज्य मंकाः संघर्ष समितिया थीथी घटकया दुजःतय्सं आः जुइगु न्हूगु चुनावय् नेवाः स्वायत्त राज्य नापं पहिचान सहितया संघीयताया पक्षय् मत अप्वयेकेत मंकाः संघर्ष समितियात न्हूगु कथं मोर्चा दयेकाः यंकेमाःगु बिचाः प्वंकूगु दु ।
जेठ १८ हाकुगु न्हि खुन्हु लाकाः संघर्ष समितिं देय्या राजनीतिक अवस्थाया बारे याःगु अन्तरक्रिया ज्याझ्वलय् घटकया दुजःतय्सं सरकारं मंसिर ७ गते निर्वाचन घोषणा यायेधुंकूगुलिं उकीयात लक्षित यानाः आवंनिसें हे संघर्ष समितियात मोर्चा दयेकाः थःगु उपस्थिति क्यनेमाःगु खँय् बः बिउगु खः ।
संघर्ष समितिया नायः दिलिप महर्जनया नायःसुइ जूगु ज्याझ्वलय् प्रो. माणिकलाल श्रेष्ठं नेवाःत नापं फुक्कसित पहिचान सहितया संघीय व्यवस्थाया बारे ध्वाथुइकुसें एजेण्डा मिलेजूपिं नापं छप्पँ जुयाः वनेमाःगु धयादिल ।
उगु हे ज्याझ्वलय् संविधानविद् पूर्णमान शाक्यं न्हूगु निर्वाचनय् वनेत छुं छुं संविधानया धारा पंगः जूसां उकीयात राष्ट्रपतिया स्वीकृति कयाः बाधा अधकाउ फुकाउया व्यवस्था यानाः न्हूगु संसदपाखें उकीयात संशोधन यायेगु कथं निर्वाचनय् वनेफइगु धयादिल ।
अथेहे नेकपा (एमाले)या केन्द्रीय दुजः राजेन्द्र श्रेष्ठं संविधानसभा विघटन छाय् जुल धइगु बारे थःगु बिचाः न्ह्यथनादिसें आः झी न्हूगु निर्वाचनय् वनेगु हे बांलागु लँपु जुइगु धयादिल । ज्याझ्वलय् पुलांपिं सभासद्त तिर्थराम डंगोल, राजकाजी महर्जन व बुद्ध साय्मिं नेवाःत छप्पँ जुयाः संघर्ष यानाच्वनेमाःगु बिचाः प्वंकादीगु खः ।
