बन्द ताःलाःगुलिं सुभाय्
यें (सन्ध्या टाइम्स) / वंगु जेठ १८ गते जूगु नेपालमण्डल बन्द तःजिक सफल जूगुलिं सकलें नेवाः कार्यकर्ता नापं बन्द बन्दयात समर्थन याःपिं सकसितं ग्वसाः खलः नेवाः स्वायत्त राज्य मंकाः संघर्ष समितिं सुभाय् देछाःगु दु ।
थ्व बन्दपाखें यदि राज्यं नेवाः स्वायत्त राज्य मदुगु संविधान दयेकल धाःसा नेवाः जनतां उकियात अस्वीकार याइगु संकेत बिउगु खँ नं वक्तव्यय् धयातःगु दु । लिसें वक्तव्यय् बन्द कुन्हु येँया थीथी थासय् जूगु सुनियोजित आक्रमणपाखें छुं कार्यकर्तात घाःपाः जूगु खँ न्ह्यथँसें आक्रमणकारीतय्त तुरुन्त ज्वनाः कानुनी कारवाही यायेमाल धकाः नं माग यानातःगु दु । वक्तव्यय् उगु आक्रमणय् लानाः घाःपाः जूपिं कार्यकर्तातय् शिघ्र स्वास्थ्यलाभया कामना नं यानातःगु दु ।
