जनजातित वइगु चुनावया निंतिं गोलबद्ध जुइगु
आदिवासी जनजातिया न्ह्यलुवापिंसं वइगु मंसिरय् यायेगु धकाः सरकारं घोषणा याःगु संविधानसभाया निर्वाचनय् आदिवासी जनजातित छगू राष्ट्रिय राजनीतिक शक्ति कथं रुपान्तरित जुइगु खँ धाःगु दु । आदिवासी जनजाति संयुक्त संघर्ष समितिं बुधवाः ग्वसाः ग्वःगु सहलह ज्याझ्वलय् जनजाति नेतातय्सं वइगु निर्वाचनय् जातीय पहिचान सहितया संघीयताया निंतिं छगु शक्ति जुइगु प्रतिबद्धता प्वंकूगु खः । ताः ई न्ह्यःनिसें जातीय पहिचान सहितया संघीय प्रदेश नीस्वनेत माग तयावयाच्वंगु खःसां आदिवासी जनजातिया मागयात नेपाली कांग्रेस व नेकपा (एमालें) सम्बोधन मयाःगु द्वपं नं वय्कःपिंसं बिउगु दु ।
देय्या तःधंगु राजनीतिक दलतय्सं आदिवासी जनजातियात बेवस्ता याःगुलिं आदिवासी जनजातितय्सं ब्यागलं राजनितिक दल नीस्वने माःगु माग वयाच्वंगु व कांग्रेस व एमाले पहिचान सहितया सघीयताया विरोधी जूगु निष्कर्ष आदिवासी जनजाति संयुक्त संघर्ष समितिं पिकाःगु खँ समितिया सचिवालय संयोजक पशुराम तामाङं कनादिल ।
जातीय पहिचान सहितया संघीयताया विरोधीतय् हुनिं संविधानसभा विघटन जूगु निष्कर्ष समितिं पिकाःगु दु । नापं समितिं जातीय पहिचान विरोधी दल व नेतातय् भण्डाफोर यायेगु खँ समितिया दुजः नापं नेपाल आदिवासी जनजाति महासंघया महासचिव आङकाजी शेर्पां कनादिल । वइगु संविधानसभाया चुनावय् आदिवासी जनजातितय् पक्षय् दुईतिहाइ मत वइगु कथं समितिं रणनीति द्येकेगु व उकीया निंतिं मधेसी, मुस्लिम व दलितनाप नं सहकार्य जुइफइगु खँ वय्कलं कनादिल ।
