कांग्रेस व एमालेया कारणं संविधानसभा भंग : आदिवासी जनजाति
आदिवासी जनजाति संयुक्त संघर्ष समितिं यथास्थितिवादी व पहिचान सहितया संघीयताया विरोधी नेपाली कांग्रेस व नेकपा (एमाले)या हुनिं संविधानसभा भंग यायेगु षडयन्त्र जूगु द्वपं बिउगु दु ।
संघर्ष समितिया सचिवालय संयोजक परशुराम तामाङं मंगलवाः छगू विज्ञप्ति पिथनाः आदिवासी जनजाति नापं मधेसी, दलित, मिसा, उत्पीडित जनताया संविधान पिथनेत पहिचान सहितया संघीयताया पक्षय् दुइ तिहाइ दुजःत दुसां अनं संविधान जारी मयासें भंग यायेगु ज्या याःगु धासें खेद व्यक्त याःगु दु ।
विज्ञप्तिइ संकीर्ण बिचाः व प्रवृत्ति दुपिंसं संविधानसभा भंग यानाः अझ नं हाथ्या बियाच्वंगु धासें अज्याःगु हाथ्या विरुद्ध आदिवासी जनजातित निरन्तर आन्दोलनय् दुगु व जातीय पहिचानसहियया संघीयता, संघीयता सहितया संविधान व स्वायत्तता सहितया प्रदेशया निंतिं जनजातिया आन्दोलन निरन्तर न्ह्यानाच्वंनीगु खँ न्ह्यथनातःगु दु ।
अथेहे संघर्ष समितिं वइगु जेठ २१ गते यलय् केन्द्रीकृत आमसभा व जिल्लास्तरय् नेपाल जनजाति महासंघया व्यवस्थापनलय् भण्डाफोर ज्याझ्वः न्ह्याकेगु खँ नं धयातःगु दु ।
