संविधानसभा भंग, मेगू चुनाव मंसिर ७ गते
ताः ई निसें जनतापाखें निर्वाचित जूपिंसं नेपाःया संविधान दयेकीगु नेपाःमिपिनि आशा आइतवाः निराशाय् परिणत जुल । अन्ततः राजनीतिक दलतय् थःथःगु हे अडानया हुनिं न्हूगु संविधान बिना हे संविधानसभा भंग जुल ।
संविधानसभा भंग नापं सरकारं मेगू संविधानसभाया चुनाव मंसिर ७ गते यायेगु धकाः घोषणा याःगु दु । चान्हय् देय्या नांमय् सम्बोधन यानादिसें डा. बाबुराम भट्टराईं न्हूगु चुनावय् वनेगु बाहेक मेगू विकल्प मदुगु धासें मंसिर ७ गते चुनावया घोषणा यानादीगु खः ।
थ्वस्वयां न्ह्यः राजनीतिक दलत दथुइ संघीयताया विषयलय् न्हिच्छि धाइथें सहलह जूसां एकल पहिचान वा बहुपहिचान धइगु खँय् सहमति जुइमफेवं दलत संविधानसभा भंग यायेगु निर्णयलय् थ्यंगु खः ।
