ब्राम्हण-क्षेत्रीयात आदिवासी धलखय् तये दइमखु : एआईपिपि
नेपाःया ब्राम्हण-क्षेत्री समुदाययात सरकारं आदिवासीया धलखय् तयेगु निर्णय प्रति एसिया इण्डिजिनस पिपल प्याक्ट फाउण्डेशन (एआईपिपिं) थःगु ध्यानाकर्षण जूगु खँ न्ह्यथंगु दु ।
फाउण्डेशनया महासचिव जोन कार्लिङं व कार्यकारी दुजः शंकर लिम्बुं मंकाः कथं विज्ञप्ति पिथनाः नेपाः सरकारं आईअलओ १६९या अन्तार्राष्ट्रिय कानुन विपरित नेपाःया खस-आर्य (क्षेत्री, ब्राम्हण, ठकुरी, दशनामी व दलित)यात आदिवासी धलखय् दुथ्याकातःगु खँ न्ह्यथंगु दु ।
सहमतिं स्पष्ट रुपं छुं समुदाययात शासक दयेकाः आदिवासीतय् आत्मनिर्णयया अधिकारयात संविधानय् दुमथ्याकेगु कुतः जूगु खँ न्ह्यथंसें विज्ञप्तिइ सामाजिक द्वन्द्व ब्वलंकीगु थज्याःगु निर्णय लितकायेत सरकार नाप माग याःगु दु ।
अथेहे एआईपिपिं आईएलओ १६९ व आदिवासी सम्बन्धी संयुक्त राष्ट्र संघया घोषणा कथं नेपाःया आदिवासीतय्सं ल्ह्वनाच्वंगु जमिन, जंगलय् थःगु स्वामित्व व थःगु पहिचान नापं आत्मनिर्णयया अधिकार कथंया संघीय व्यवस्थाय् थःपिनि राजनीतिक प्रतिनिधित्व जुइगु माग प्रति नं एक्यबद्धता प्वंकूगु दु ।
