प्रचण्ड व वैद्य दथुइ सहलह
पार्टीयात छप्पं छधी यानाः न्ह्याकेगु विषयस एकीकृत नेकपा (माओवादी)या सस्थापन पक्ष व उपाध्यक्ष मोहन वैद्य पक्ष दथुइ सहलह जूगु दु । पार्टी नायः पुष्पकमल दाहाल 'प्रचण्ड'या लाजिम्पाटस्थित छेँय् जूगु सहलहस पार्टीयात छधी याः यंकेगु व जनपक्षीय संविधानया निंतिं पार्टीं थौं तक कयाच्वंगु अडानबारे सहलह जुगु खँ नायः प्रचण्डया ग्वाहालिमि शिव खकुरेलं कनादिल ।
अथेहे उगु इलय् जेठ १४ गते दुने संविधान द्येकेगु विषयस गथे याना न्ह्याः वनेगु धकाः नं सहलह जूगु खः । संविधानय् फुक्कं वर्ग, क्षेत्र, लिङ्ग मिसा, आदिवासी जनजाति नापं थीथी क्षेत्रं ल्ह्वनाः च्वंगु सःयात सम्बोधन यायेमाःगु व राज्य पुनर्संरचना आयोगं न्ह्यःब्वःगु १०गू प्रदेश व संविधानसभाया राज्य पुनर्संरचना समितिं न्ह्यब्वःगु १४गू प्रदेशय् हे अडान तयाः च्वनेमाःगु खँ वैद्य पक्षं पार्टी नायःयात इनाप याःगु खः ।
वैद्यं यथास्थीतिवादी व ह्युपाः चाहे मजूगु नेपाली कांग्रेस व नेकपा (एमाले) नापं छुं नं कथं लचक मजुइत नं नायःयात सुझाव बियादीगु खः । लिसःलय् नायः प्रचण्डं थौं तक सहमतिया नांमय् जनपक्षीय एजेण्डा त्वतेगु ज्या मयानाःगु दाबी यानादिल ।
