वैद्य पक्ष पार्टी तछ्यायेत तयार
ताः ई निसें पार्टी दुने प्रतिपक्षया भूमिका निर्वाह यानावयाच्वंम्ह एकीकृत नेकपा (माओवादी)या वरिष्ठ उपाध्यक्ष मोहन किरण बैद्य पुचलं पार्टी तछ्यायेगु अन्तिम तयारी यानाच्वंगु दु ।
सैद्धान्तिक कथं पार्टी विभाजित जुइ धुंकूगु खःसां व्यवहारिक कथं जक पार्टी तछ्याये ल्यदनिगु सार्वजनिक
अभिव्यक्ति बियावयाच्वंगु वैद्य पुचलं पार्टीया संसदीय दल तछ्यायेगु तयारी यानाच्वंगु खँ स्रोतं धाःगु दु ।
संविधानसभा नियमावली कथं ४० प्रतिशत सभासद् कयाः मेगु पार्टी द्येकेगु नियम दु । वैद्य पक्षय् थ्व इलय् ९६म्ह सभासदत दु । उमिगु ल्हाःचिं मुंकेगु ज्या वैद्य पक्षं यायेधुंकूगु दु ।
पार्टी नायः पुष्पकमल दाहाल 'प्रचण्ड' व प्रधानमन्त्री नापं पार्टी न्वकु डा. बाबुराम भट्टराईं पहिचान सहित जातीय आधारय् संघियता द्येकेगु पार्टीया ऐजेण्डा सम्वोधन मजूसा वा थ्व विषयस पार्टीया स्पष्ट अडान मवसा औपचारिक कथं पार्टी विभाजन यायेत तयारी जुयाच्वंगु स्रोतं धाःगु दु ।
