नेवाः व जनजाति नाप जूगु वार्ताय् सहमति जुइमफुत
आदिवासी जनजाति संयुक्त संघर्ष समिति व नेवाः स्वायत्त मंकाः संघर्ष समिति नाप सरकारं सोमवाः याःगु वार्ताय् सहमति जुइमफुत । वार्ताय् जातिय पहिचानया आधारय् राज्य पुनर्संरचना यायेगु खँय् सरकार व आन्दोलनकारी सहमति नापं थ्यंसां सहमतिइ सरकारं ल्हाःचिं तयेगु वा प्रमुख दलया नेतातय्सं ल्हाःचिं तयेगु धइगु विषयलय् विवाद जुइवं सहमति जुइ मफुगु खः ।
वार्ताय् आन्दोलनकारी पक्षं राज्य पुनर्संरचनाया विषय सरकारया अधिकार क्षेत्रया खँ मजूगुलिं सरकारं सहमतिइ ल्हाःचिं तयाः छुं नं अर्थ मदइगु धासें प्रमुख दलया शीर्ष नेतातय्सं ल्हाःचिं तयेमाःगु माग याःगु खः । उगु माग यायेवं सरकारी वार्ता पुचलं शीर्ष नेतातय्त न्यनेमानी धकाः वार्ता स्थगित याःगु खः ।
थ्वस्वयां न्ह्यः वार्ताय् सरकारी पक्षं एकल पहिचानया आधारय् राज्य पुनर्संरचना यायेत थाकुइगु खँ धाःगु खः । उकीया पलेसा संविधानसभाया राज्य पुनर्संरचना व राज्य शक्तिया बाँडफाँट समिति व राज्य पुनर्संरचना उच्चस्तरीय आयोगं तयार याःगु आधार कथं प्रदेश निर्माण यायेगु खँय् निगूलिं पक्ष सहमति नापं थ्यंगु खः ।
आदिवासी संयुक्त संघर्ष समिति नाप प्रमुख प्यंगू शक्तिया नेतातय्सं न्हिनय् वार्ता याःगु खःसा सनिलय् संयुक्त संघर्ष समिति व नेवाः स्वायत्त राज्य मंकाः संघर्ष समितिनाप मंकाः कथं सरकारं वार्ता याःगु खः ।
सरकारी पक्षं शीर्ष नेतातय्त न्यनाः मंगलवाः वार्ताया बारे खबर यायेगु धायेवं सोमवाःया निंतिं वार्ता स्थगित जूगु खः ।
