आदिवासी संयुक्त संघर्ष समितिपाखें प्यंगू बुँदे माग न्ह्यब्वल
आदिवासी जनजाति संयुक्त संघर्ष समिति व प्रमुख प्यंगू राजनीतिक शक्तित दथुइ जूगु वार्ताय् प्यंगू बुँदे माग न्ह्यब्वःगु दु । वार्ता जुइवं दलया नेतातय्सं बन्द लितकायेत इनाप याःगु खःसां जनजाति नेतातय्सं बन्द व वार्ता निगूलिं नापं यायेगु जुइ धासें बन्द लितकायेत अस्वीकार याःगु खः ।
संविधानसभा भवन न्हू बानेश्वरय् सोमवाः जूगु वार्ताय् संघर्ष समितिं आत्मनिर्णयया अधिकार सहितया जातिय पहिचान दुगु राज्य निर्माण यायेमाःगु, आन्दोलनया झ्वलय् ज्वनातःपिं जनजाति कार्यकर्तातय्त त्वःतेमाःगु व घाःपाः जूपिंत वासः याकेमाःगु लगायत माग न्ह्यब्वःगु दु ।
वार्ता न्ह्यायेवं निगूलिं पक्षया खँ न्यनेगु ज्या जूगु खः । वार्ताय् उपस्थित एनेकपा (माओवादी)या नायः पुष्पकमल दाहाल 'प्रचण्डं' एकल जातिय पहिचानया आधारय् राज्य पुनर्संरचना यानाः इलय् हे संविधान जारी यायेमाःगु बिचाः प्वंकादीगु खः ।
नेपाली कांग्रेसया सभापति सुशील कोइरालां नं पहिचानया विषययात बेवास्ता यानाः राज्य पुनर्संरचना याये थाकुइगु खँ न्ह्यथनादीगु खः । नेकपा (एमाले)या नायः झलनाथ खनालं धाःसा एकल जातिय पहिचानया आधारय् राज्य पुनर्संरचा यायेमफइगु बिचाः प्वंकादीगु खँ सूत्रं धाःगु दु ।
वार्ता छुं ईया निंतिं स्थगित यायेगु धाःसां आः तक हानं वार्ता जुइ मफुनी । वार्ताय् प्रधानमन्त्री डा. बाबुराम भट्टराई, माओवादी नायः प्रचण्ड, कांग्रेस सभापति कोइराला, एमाले नायः खनाल, मधेशी मोर्चापाखें महन्त ठाकुर लगयतया ब्वति दुगु खः ।
अथेहे जनजातितय् पाखें संयुक्त संघर्ष समितिया संयोजक सुरेश आले मगर, सचिवालय संयोजक परशुराम तामाङ, नेपाल आदिवासी जनजाति महासंघंया नायः राजकुमार लेखी, नेवाः देय् दबूया नायः नरेश ताम्राकार लगायतं ब्वति काःगु खः ।
