सहकारी पसःया ४३ लाख वजेट 'ल्याप्स’ जुइगु अवस्थाय्
वीरगंज (सन्ध्या टाइम्स) / एकीकृत नेकपा माओवादीया नेतृत्वय् दुगु तत्कालीन सरकारं पर्साया प्रत्येक गाविसय् सुपथ मूल्य पसः संचालनया निंतिं विनियोजन यानाः निकासा याःगु दां मध्ये ४३ लाख तका दां 'ल्याप्स' जुइगु अवस्थाय् थ्यंगु जानकारी डिभिजन सहकारी ज्याकू पर्सां बिउगु दु ।
उगु सहकारी पसः संचालनया निंतिं तत्कालीन माओवादी नेतृत्वया सरकारं सहकारी संस्था मार्फत सुपथ मूल्य पसः संचालन यायेत छगू छगू लाखया ल्याखं कूल ८३ लाख वजेट विनियोजन याःगु खःसा उकी मध्ये ४० लाख खर्च जुइधुंकूगु दु ।
देय् न्यंकंया प्यद्वः गाविसया निंतिं उकथंया वजेट निकासा याःगु खः ।
स्वीद्वः जनसंख्या दुगु नगरपालिकाय् छगू सुपथ मूल्यया पसः संचालन यायेत डिभिजन सहकारी ज्याकूपाखें छगू लाख अनुदान बिउगु खः ।
अज्याःगु पसः संचालनया निंतिं वीरगंज उप महा-नगरपालिका दुने न्यागू निवेदन दुहां वःगु खःसा चय्निगू गाविस मध्ये ३५ गू गाविसया निंतिं वजेट निकासा जूगु खँ डिभिजन सहकारी ज्याकूया छम्ह अधिकारीं धयादिल ।
