जनजाति व मधेशीतय्सं यानाच्वंगु आन्दोलन जायज : मन्त्री यादव
सूचना व संचारमन्त्री राजकिशोर यादवं आन्दोलन मार्फत आदिवासी, जनजाति व मधेशीतय्सं ल्ह्वनाच्वंगु माग पूमवंसाः देय् गम्भीर दुर्घटनाय् लाइगु ख्याच्वः बियादीगु दु ।
आइतवाः जूगु छगू साक्षात्कार ज्याझ्वलय् मन्त्री यादवं पहिचानया निंतिं जनतां यानाच्वंगु आन्दोलनयात जायज धयादिसें एक्यबद्धता व समर्थन नापं यानादिल ।
शोषित व पीडित जनतां ल्ह्वनाच्वंगु माग पूवंकेत इलय् हे उपयुक्त निर्णय काःसा जक देय् समृद्ध जुइगु नं मन्त्री यादवं धयादिल ।
वय्कलं कोठाय् च्वनाः याइगु गोप्य सहमति मान्य मजुइगु धयादिसें सार्थक संविधान हयेत आन्दोलन जुयाच्वंगु न्ह्यथ्नादिल ।
साक्षात्कारय् आदिवासी जनजाति संयूक्त संघर्ष समितिया सचिवालय संयोजक पर्शुराम तामाङं हैसियत मदुगु सरकारी वार्ता पुचः नाप वार्ता मयाये स्पष्ट यानादिसें प्रमुख दलया शीर्ष नेता व प्रधानमन्त्रीया ब्वति दुगु वार्ता पुचः नाप जक वार्ता यायेगु धयादिल ।
