बन्दया झ्वलय् किपुलिई स्वंगः मोटरसाइकल तोडफोड
आदिवासी जनजातितय्सं थनिंनिसें स्वन्हुतक आह्वान याःगु नेपाल बन्दया थौं न्हापांगु न्हि, किपुलिई सामान्य झडप जूगु दु । बन्द याकेगु झ्वलय् नयाँबजारय् मुनाच्वंपिं बन्द आह्वानकर्तातय्सं सुथय् स्वंगः मोटरसाइकल तोडफोड यानाब्यूगु दु ।
सुथय् करीव ७:३० बजेपाखे कान्तिपुर पत्रिका ज्वनावःगु मोटरसाइकलयात दिकाः पत्रिका समेत च्याकुसे मोटरसाइकल तोडफोड यानाब्यूगु खः। अथेहे त्रिभुवन विश्वविद्यालयपाखें दुरुज्वनावःगु मोटरसाइकल व छेँय् वनेत वःगु मोटरसाइकलयात बन्दकर्तातय्सं लोकतान्त्रिक चोकय् तोडफोड यानाब्यूगु खः ।
नयाँबजारं बन्दया आह्वानयासें न्ह्याःगु जुलुस छथ्वः खासी बजारपाखे वंगु खःसा मेथ्व भत्क्यापाटीपाखे वंगु खः । करीव २०/२५ म्हति जकदुगु थुगु पुचःयात कमजोर तायेका भत्क्यापाटीच्वंपिं स्थानियतय्सं 'जिमिसं बन्द याये मखु, छु याये फु या' धकाः ख्याच्व समेत ब्यूगु खः । बन्दया अवज्ञायासें चायेकाःतःगु भत्क्यापाटी स्थित ग्रीनभिलेज स्कूल नं बन्द याकेगु झ्वलय् झडप जूगु खः । भत्क्यापाटी गैर नेवाःत अप्वःच्वनीगु थाय् खः । बन्दकर्तातय्त लिनाछ्वयेगु तातुनां घरायसी हतियार समेत ज्वना पिहाँ वःगु खः ।
लिपा निथ्वसिया दथुइ राजनितिक पार्टीया प्रतिनिधित च्वनां प्यूगु बुँदे सहमति जूगु खः ।
