आदिवासी जनजातितय् बन्दं देय्न्यंकया जनजीवन प्रभावित
आदिवासी जनजाति संयुक्त संघर्ष समितिया आव्हानय् जूगु स्वन्हुन्यंकया नेपाल बन्दया न्हापांगु न्हि आइतवाः देय्न्यंकया जनजीवन प्रभावित जुल । न्हापा लिपाया बन्दय् चले जुइगु साकइल तकं प्रदर्शनकारीतय्सं चले यायेत रोक लगे याःगु दु ।
पहिचान सहितया संघीयता दुगु संविधान इलय् हे जारी यायेमाःगु माग यासें याःगु बन्दया हुनिं स्वनिगः लगयात देय्न्यकंया शिक्षण संस्था, कलकारखाना, पसः नापं फुक्कं कथंया सवारीसाधन ठप्प जुल ।
बन्द सफल यायेत सुथंनिसें येँय् लगायत थीथी थासय्र प्रदर्शनकारीत जम्मा जुयाः जुलुस पिकाःगु खः । नेवाःतय्सं येँया असं, यलया मंगलबजाः, ख्पव, किपु लगायतं बन्द सफल यायेत आव्हान यासें जुलुस पिकागु खः ।
यलया ग्वार्को प्रहरी व प्रदर्शनकारीत दथुइ छझाः ल्वापु जूगु खःसा प्रहरीं अन छगू दर्जन टियर ग्याँस तकं प्रहार याःगु खः । ल्वापुइ लानाः निम्ह प्रदर्शनकारी व निम्ह प्रहरी घाःपाः जूगु दु ।
बन्दया झ्वलय् थीथी थासं प्रदर्शनकारीतय्त प्रहरीं ज्वनायंकूगु दुसाः कान्तिपुर पब्लिकेशन, एभिन्युज व कारोबार दैनिकया गाडी तोडफोड व हिमालयन टेलिभिजनया मोटरसाइकल प्रदर्शनकारीतय्सं च्याकाः बिउगु दु ।
थ्वहे झ्वलय् नेपाल आदिवासी जनजाति महासंघं अत्यावश्यक सवारी साधन नापं प्रेस, एम्बुलेन्स, कुटनितिक नियोगया गाडियात अवरोध मयायेत इनाप यासें विज्ञप्ति पिथंगु दु ।
उखे संचार माध्यमय् जूगु आक्रमणया विरोधय् नेपाल पत्रकार महासंघं आइतवाः हे छगू र्याली पिकाःगु दु ।
