पहिचान बिनाया ११ प्रदेशय् जूगु सहमति प्रति नेवाःतय् विरोध

नेवाः स्वायत्त राज्य मंकाः संर्घष समितिं स्वंगू तःधंगु राजनीतिक दलतय्सं ११ प्रदेश लिसें थीथी खुगू बुँदाय् याःगु सहमतिया विरोध याःगु दु । समितिं छगू विज्ञप्ति पिथंसें नेपाःया अन्तरिम संविधान २०६३या भावना अःखः थुगु सहमति याःगु धासें थुकिं आदिवासी जनजातिया पहिचान नापं हक अधिकारयात अझ संकुचित याइगु खँ न्ह्यथनातःगु दु ।

वर्गीय, क्षेत्रीय, सांस्कृति, भाषिक, धार्मिक व जातीय उत्पीडन न्हंकेगु निंतिं अग्रगामि संघीय पुनर्संरचना यायेगु व उकिया झवलय् आदिवासी, जनजाति, मधेशी लगायत मेमेगु अल्पसंख्यक वर्ग व क्षेत्रया स्वायत्तताया मनंतुना पूवंकेगु धकाः अन्तरिम संविधानया धारा-१३८या प्रावधान कथं मजूगुलिं थ्व सहमतिया कानुनी हैसियत तकं मदुगु धकाः विज्ञप्तिइ धयातःगु दु ।

छुं हे अध्ययन व छुं नं वैज्ञानिक आधार मदयेकं हे उगु सहमतिं प्रदेशया ल्याः क्वःछिनातःगुलिं थुकिं प्रदेश दयेकेवलय् पहिचानया आधारय् दयेकेगु धकाः राज्यपुनर्संरचना तथा राज्य शक्ति बाँडफाँड समिति व राज्य पुनर्संरचना उच्चस्तरीय आयोगं तयार याःगु सिद्धान्तयात तकं च्यूताः मतः धकाः नं विज्ञप्तिइ धयातःगु दु ।

न्हापा थीथी इलय् जूगु थीथी सम्झौताय् आदिवासी जनजातितय्गु ऐतिहासिक भूमि, स्वायत्तता, स्वशासनया आधारय् इमिगु विशिष्ट पहिचान दइगु राज्य स्वनेगु धकाः प्वंकातःगु प्रतिवद्धताया अःखः थुगु सम्झौता जूगु न्ह्यथंसें विज्ञप्तिइ जनप्रतिनिधितय्गु संविधानसभाया र्सार्वभौम अधिकार तकं न्हंकाः गैरलोकतान्त्रिक षडयन्त्र जूगु खँ नं धयातःगु दु ।

विज्ञप्तिइ मू राजनैतिक दलं जेष्ठ २ गते याःगु सहमति खारेज यायेमाःगु, संविधानसभाया र्सार्वभौम अधिकार लाकाकयाः गोप्य सहमति यायेगु षडयन्त्र दिकेमाःगु, याकनं हे संविधानसभाया नियमित प्रक्रिया न्हृयाकेमाःगु, संविधान इलय् हे पितबीमाःगु, दक्वः आदिवासी जनजातितय्गु स्वायत्तता, स्वशासन, आत्मनिर्णय व अग्राधिकार सुनिश्चित जुइमाःगु, एकल पहिचान दइगु राज्य पुनर्संरचना यायेमाःगु माग नं यानातः दु । थःपिनि माग पूमवंसा सकल नेवाःत सतकय् कुहां वयेत बाध्य जुइ धकाः विज्ञप्तिइ न्ह्यथनातःगु दु ।

News Location: