ताम्सालिङ बन्दय् ल्वापु
कन्हसंनिसें मधेश बन्द
यें (सन्ध्या टाइम्स) / प्रधानसेनापति रुक्मांगद कटवालयात पुनर्नियुक्ति यायेगु राष्ट्रपति डा। रामवरण यादवया पलाः भिंकेमाःगु माग यासें माओवादी समर्थित तामाङ राष्ट्रिय मुक्ति मोर्चां याःगु ताम्सालिङ बन्दय् थाय्थासय् ल्वापु जूगु दु ।
बन्दकर्तायत्सं सुथय् साँगाय् छगः मोटरसाइकल तोडफोड यायेवं स्थानीय ल्याय्म्हतय्सं बन्दया प्रतिकार याःगु खः । थ्वहे झ्वलय् उमिसं भ्वँतय् च्वंगु माओवादीया ज्याकू नं तोडफोड याना बिउगु दु । ज्याकुथी तोडफोड जुइवं प्रहरीं स्थिति नियन्त्रणय् कायेत लाठीचार्ज व च्यागू राउण्ड टियरग्याँस कयेकूगु दु । ल्वापुं यानाः अनया स्थिति तनावग्रस्त जुयाच्वंगु दु ।
उखे ताम्सालिङ बन्दया कारणं काभ्रे दोलखा सिन्धुली सिन्धुपाल्चोक मकवानपुर चितवन धादिङ लागाय् यातायात ठप्प जुयाच्वंगु दु । धादिङ हेटौंडा व चितवनय् स्वनिगलं वनाच्वंगु व स्वनिलय् वयेमाःगु आपालं गाडी रोके जुयाः द्वलंद्वः यात्रुत अलपत्र जुयाच्वंगु दु ।
उखे सरकारं विजय गच्छदारयात उपप्रधानमन्त्री दयेकाः थःगु पार्टी तछ्याःगुया विरोध यासें मधेशी जनअधिकार फोरमं कन्हसंनिसें तराई बन्द यायेत्यंगु दु ।
उकिया निंतिं थौं फोरमया सकलें केन्द्रीय नेतात तराईपाखे वनेगु तयारी यानाच्वंगु दु । थौं हे सकलें केन्द्रीय नेतात येँय् त्वःताः तराईया थीथी थासय् वनेगु व अन च्वनाः एमाले विरुद्ध आन्दोलन तच्वयेकेगु तयारी जुयाच्वंगु खँ सूत्रं धाःगु दु । फोरमया कार्यकर्तातय्सं म्हिगः नं येँय् छगू जुलुस पिकयाः विजय गच्छदारया विरोध याःगु खः ।
उखे थौं हे विजय गच्छदार पुचःया नं बिस्कं बैठक च्वनाः आः गय् यानाः न्ह्याः वनेगु धकाः रणनीति दयेकाच्वंगु खँ धाःगु दु ।
गच्छदार पुचलं थःके ३२ म्ह सभासद् दु धकाः दावी यानाच्वंगु दु ।
