'आदिवासी जनजाति नेतातय्त लोभ क्यनाच्वन'
नेकपा (एमाले)या नेता राजेन्द्र श्रेष्ठं आदिवासी नेता व सभासद्तय्त स्वंगु दलया सहमतिं पिदंगु ११ प्रदेशया प्रस्तावयात ज्यू धायेकेत थीथी कथंया प्रलोभन बियाच्वंगु खँ धयादीगु दु ।
बिहीवाः यलय् जूगु छगू आमसभाय् न्ववानादिसे आदिवासी जनजाति आन्दोलनय् न्ह्यःने खनेदुपिं न्ह्यलुवातय्त थज्याःगु प्रलोभन क्यनेगु ज्या जुयाच्वंगु खँ कनादिसें थज्याःगु छुं नं लोभं थुगु आन्दोलन मदीगु खँ वय्कलं स्पष्ट यानादिल ।
ज्याझ्वलय् नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं जातीय राज्यया नां बियाः यानाच्वंगु गलत प्रचार खः धयादिसें आदिवासी जनजातिया माग धइगु पहिचान दुगु राज्य खः धयादिल । थुगु पहिचान सहितया राज्य हयेगु निंतिं आन्दोलन न्ह्यायेधुकूगु धयादिसें वय्कलं सकलें नेवाःत दनावयेमाः धयादिल ।
नेवाः राजनीतिक अभियानया संयोजक महेशमान श्रेष्ठ बालं च्वंवःपिन्सं छेँ थुवाः पितनेगु ज्या यायेत सनाच्वंगु खँ न्ह्यथनादिल । स्वनिगःया भाय्, संस्कृति, सम्पदा, लः दक्वं न्हनाच्वंगु इलय् न्ह्यलं चायेकाः आन्दोलनय् सक्रिय ब्वति जुयाः ब्वति कायेत नं वय्कलं इनाप यानादिल ।
ज्याझ्वलय् न्ववानादिसें जनजाति नेता डा. कृष्ण भट्टचनं प्रत्येक आन्दोलनय् मू भूमिका म्हितूपिं नेवाःत छेँखां छम्ह-छम्ह जक पिहांवःसां षडयन्त्र यानाच्वंपिं बुइ धकाः धयादिल । २०५८ सालया जनगणनां झेल्ला यानाः तथ्याङ्क पिथंगु खँ कनादिसें वास्तविक आदिवासी जनजातितय्गु ल्याः सुचुकूगु खँ नं वय्कलं न्ह्यथनादिल । अखण्ड सुदूरपश्चिम आन्दोलनय् तकं थारुतय्गु आन्दोलन दबेयायेगु व अखण्डताया आन्दोलनयात तिबः बीगु ज्या प्रशासनं यानाच्वंगु खँ नं उलादिल । थज्याःगु स्थिति हिलेत सकलें दनेमाः धकाः बः बियादिसें वय्कलं आन्दोलनय् सक्रिय जुयादीत नं इनाप यानादिल ।
अथेहे ज्याझ्वलय् नेवाः स्वायत्त राज्य मंकाः संघर्ष समितिया नायः बाबुराजा बज्राचार्यं स्वंगू दलया दथुइ ११ प्रदेशया सहमति लिपा वःगु नक्सा छगू हे मजूसे थीथी कथंया पिदंगु खँ कनादिल । नेवाः लगायत आदिवासी जनजातितय्सं थःगु अधिकारया निंतिं तयाच्वंगु सः गलत तरिकां थीथी संचार माध्यमं प्रचार यानाच्वंगुलिं झी दथुइ नं भ्रम ब्वलंगु खँ न्ह्यथंसे थज्याःगु भ्रम चीका थःगु अधिकार कायेगु निंतिं घोषणा जूगु थीथी ज्याझ्वलय् सक्रिय जुयाः ब्वति कायेमाः धयादिल ।
आमसभा नेवाः राजनीतिक अभियान, मांभाय् पुचः व मन्तुना मिसा खलःया ग्वसालय् जूगु खः ।
