नेवाः काय्मचा मन्त्री जुइगु ह्वःता त्वःते मज्यू : मन्त्री शाक्य
छम्ह नेवाः काय्मचायात मन्त्री जुइगु ह्वःता चूलागु त्वःते मज्यूगु विचारं सरकारय् वनागु खँ न्हूम्ह मन्त्री डा. केशवमान शाक्य कनादीगु दु । बिहीवाः नेवाः मिडिया क्लबया विधिवत् उलेज्याझ्वःस मूपाहाँ कथं झायादीम्ह मन्त्री शाक्यं सतकं सरकारय् थ्यंगु धइगु मतलव कुतः याःसा पूवनीगु छगू दसू जूगु खँ कनादीगु खः ।
सितापाइला पार्टी प्यालेसय् जूगु उगु उलेज्याझ्वलय् न्ववानादिसें येँ महानगरपालिका नेवाः ज्याकःमि गुथिया नायः नरेन्द्र शाक्यं महानगरपालिकाय् नेवाः डेक्स स्थापना यायेत्यनाःगु खँ कनादिसें गुगु नं कथंया समस्या जूसा नेवाः ज्याकःमि गुथियात लुमंकेत इनाप यानादिल । नेवाःतय्गु समस्या ज्यंकेगु ज्याय् नेवाःत हे न्ह्यःने वयेमाः धयादिसें वय्कलं मेपिन्सं वयाः झीत ग्वाहालि मयाइ धकाः नं धयादील ।
ज्याझ्वलय् खड्गी सेवा समितिया किज मनोज नेवाः खड्गीं नेवाःतय्गु न्ह्यानाच्वंगु आन्दोलनय् ब्वति कयादीत सकलसित इनाप यानादिल । नेवाः पत्रकार राष्ट्रिय दबूया नायः श्री कृष्ण महर्जनं नेवाः नापं आदिवासीतय्गु आन्दोलनयात कमजोर यायेत षडयन्त्र जुयाच्वंगु खँ न्ह्यथँसे ब्रम्हु क्षेत्रीतय्सं निन्हु बन्दया नाटक यानाः एकल पहिचान न्हंकूगु ज्या यानाच्वंगु न्ह्यथनादिल ।
अथेहे ज्याझ्वलय् येँ महानगरपालिका भवन तथा सम्पदा शाखाया इन्द्रमान सिँ सुवाल, आदिवासी ज्यापु पुचःया सुवर्णमान डंगोल, क्लबया संरक्षकिपं चक्रमान डंगोल, भिमकुमार महर्जन नापं सल्लाहकारिपं कुमार रंजित, सन्तकुमार महर्जनं भितुना प्वंकूसे थःगु बिचाः तयादीगु खः ।
ज्याझ्वः क्लबया तदर्थ समिति नायः पदम श्रेष्ठया सभापतित्वय् जूगु खःसा टेलिभिजन संयोजक नविन जोशीं लसकुस यानादीगु खः । क्लबया ज्यासना पुचःया छ्याञ्जेय् आशाकाजी महर्जन, दांभरीइ शर्मिला सुवाल, अनलाइन संयोजक प्रज्वल शाक्य, रेकर्डिङ्ग स्टुडियो संयोजक रोजा श्रेष्ठ अले पत्रपत्रिका संयोजककथं प्रेरणा शाक्य च्वनादीगु दु ।
