जनजातितय् प्रदर्शनय् प्रहरी हस्तक्षेप / सभासद् सहित दर्जनौं घाःपाः
प्रमुख राजनीतिक दलतय्सं राज्य पुनर्संरचनया विषयलय् ११ प्रदेशय् याःगु सहमतिया विरोध यासें आदिवासी जनजातितय्सं बुधवाः येँय् प्रदर्शन यात । अनामनगर हनुमानथानं पिहांवःगु सिठ्ठी जुलुसयात प्रहरीं गौशालाय् हस्तक्षेप याःगु खः । उगु हस्तक्षेपय् लानाः छम्ह सभासद् नापं दर्जनौं घाःपाः जुल । गौशालाय् जनजातितय्सं प्रमुख स्वंगू दलया स्वम्ह नेतातय् पुतला च्याकेत स्वयेवं प्रहरीं हस्तक्षेप याःगु खः ।
प्रहरी हस्तक्षेपय् लानाः माओवादी सभासद् आङदावा शेर्पा, नेपाल आदिवासी जनजाति महासंघया उपाध्यक्ष इन्दिरा जिमी याखा, थारु कल्याणकारिणी सभाया कोषाध्यक्ष डम्बरप्रसाद चौधरी, तमु ह्युल छोँझधिंया महासचिव रेशम गुरुङ, आदिवासी जनजाति विद्यार्थी महासंघया धीरेन्द्र राई, लगायत दर्जनौं घाःपाः जूगु खः ।
जनजातितय्सं जातिय पहिचान बिनाया संघीयता अमान्य जुइगु धासें उकीया सशक्त प्रतिकार यायेगु ख्याच्वः बिउगु दु । संविधानसभाय् भवन न्ह्यःने जूगु कोणसभाय् जनजाति सभासदतय्सं पहिचान बिनाया संघीयता अस्वीकार्य जक मखु उकीया खारेज मयाःसा पार्टीया निर्णय माने मयायेगु ख्याच्वः नं बिउगु दु ।
बुधवाःया प्रदर्शनय् प्रहरीं हस्तक्षेप याःगु विरोधय् बिहीवाः देय्न्यंक प्रदर्शन व सभा यायेगु खँ नेपाल आदिवासी जनजाति महासंघं धाःगु दु ।
