नेपाः राष्ट्रिय पार्टी नं सरकारय्
नेपाः राष्ट्रिय पार्टीया नायः डा. केशवमान शाक्ययात बुधवाः न्हिनय् राष्ट्रपति भवन शीतल निवासय् राष्ट्रपति डा. रामवरण यादवया न्ह्यःने प्रधानमन्त्री डा. बाबुराम भट्टराईं मन्त्रीया शपथ ग्रहण याकादीगु दु ।
नेकपा एमाले, सघीय सदभावना, राष्ट्रिय प्रजातन्त्र पार्टी, परिवार दल, संयुक्त पार्टीया नेतातलिसें नेपाः राष्ट्रिय पार्टीया नायः डा. केशवमान शाक्ययात उकथं मन्त्रीया शपथ ग्रहण याकादीगु खः ।
पार्टीया नायः मन्त्री जूगु लसताय् नेपाः राष्ट्रिय पार्टीपाखें पार्टीया ज्याकुथिइ वकुन्हु हे सनिलय् भिन्तुना देछायेगु ज्याझ्वः जुल । न्हूम्ह मन्त्रीयात नेवाः परम्परा कथं ख्येँय् सगं बियाः हनेगु नापं भिन्तुना देछाःगु ख : ।
ज्याझ्वलय् १३ वडाया प्रतिनीधि रमेश स्थापित, मू दुजःपिं शरद कसाः, मंगला कारंजित, मदन तण्डुकार, शान्त प्रकाश श्रेष्ठ, किपूया हरिकृष्ण महर्जन, शशिकला मानन्धर, भूषण प्रसाद श्रेष्ठ, "सन्ध्या टाइम्स" न्हिपौया सम्पादक सुरेश किरण मानन्धर, रामशरण श्रेष्ठ, पार्टी प्रबक्ता किरण शाक्यपिन्सं भिन्तुनाया लिसें थी थी सुझाव बियादीगु खः ।
ज्याझ्वलय् नेपाः राष्ट्रिय पार्टीया सभासद बुद्धरत्न मानन्धरया नं उपस्थिति दुगु खः ।
थुगु ज्याझ्वः क्वचायेकाः नेवाःतय्गु शक्तिया प्रतिक कथं हनातःम्ह लाय्कू "कुमारी" माजुया थाय् दर्शन कायेगु ज्या नं जुल ।
