"चित्तधर सिरपाः" व "भाषा थुवाः"या उपाधि लःल्हात

नेपालभाषा परिषद लःल्हाइगु "चित्तधर सिरपाः" बुधवाः छगू ज्याझ्वःया दथुइ उज्यालो एफ एमया नेपालभाषा ज्याझ्वः 'लहना'यात लःल्हात । अथेहे नांजाःम्ह बौद्ध विद्वान दुण्ड बहादुर बज्राचार्ययात थुगसिया "भाषाथुवाः" उपाधि लःल्हानाः हंगु दु ।

परिषदया नायः फणिन्द्ररत्न बज्राचार्यया सभाध्यक्षताय् जूगु उगु ज्याझ्वलय् मूपाहां मचा साहित्यया न्ह्यलुवाः कृष्ण प्रसाद दुवालं बौद्ध विद्वान बज्राचार्ययात "भाषा थुवाः" उपाधिया हनापौ व परिषदया नायः बज्राचार्य उज्यालो नेटवर्क संचालकया नायः गोपाल गुरागाईंयात "चित्तधर सिरपाः"या दसिपौ नापं नीन्याद्वः तकाः लःल्हानादीगु खः ।

परिषदया न्वकू प्रा. सुवर्ण शाक्यं लसकुस यानादीगु उगु ज्याझ्वलय् मूपाहां कृष्ण प्रसाद दुवालयात परिषदपाखें हनेज्या नं जूगु खः ।