यातायात व्यवसायी व मजदुरत आन्दोलित
यातायात व्यवसायी व मजदुरतय्सं मंकाः रुपं थीथी माग तया आन्दोलनया घोषणा याःगु दु । मंकाः पत्रकार सम्मेलन मार्फत निगूलिं पक्षं जेठ १४ गते तक बन्द हडताल मयासें शान्तिपूर्वक आन्दोलन यायेगु सार्वजनिक याःगु दु ।
घोषित आन्दोलन कथं जेठ १० गते निसें देय्न्यकं सार्वजनिक सवारी साधनय् हाकुगु ध्याँय् तयेगु, १२ गते देय्न्यकं यातायात ज्याकुथी हाकुगु ध्याँय् तयेगु, १३ गते यातायात व्यवस्था विभाय् हाकुगु ध्याँय् तयेगु आदि ज्याझ्वत सार्वजनिक याःगु दु ।
इमिसं माग पूमवंसा १६ गते हान मंकाः मुँज्या च्वनाः शसक्त आन्दोलनया ज्याझ्वत घोषणा यायेगु ख्याच्वः नेपाल यातायात व्यवसायी राष्ट्रिय महासंघ नायः योगेन्दनाथ कर्माचार्यं बियादिल ।
ट्राफिकं जरिवाना शुल्क थःकागु खारेजी व यातायात मन्त्रालय ब्यागल दयेकेगु सहमति तोडेयाःगु द्वपं बिउगु दु । नापं जेठ १४ गते तक छु कथंया बन्द हडताल मयात इनाप याःगु दु ।
